ევროპის საბჭოს მინისტრთა კომიტეტის მოქმედმა თავმჯდომარემ, საქართველოს საგარეო საქმეთა მინისტრმა დავით ზალკალიანმა ევროპის საბჭოს გენერალურ მდივანთან მარია პეიჩინოვიჩ ბურიჩთან შეხვედრა გამართა.

როგორც „ინტერპრესნიუსს“ საქართველოს საგარეო საქმეთა სამინისტროდან აცნობეს, შეხვედრაზე კიდევ ერთხელ ისაუბრეს ევროპის საბჭოში საქართველოს თავმჯდომარეობის პრიორიტეტებზე და თავმჯდომარეობის ფარგლებში დაგეგმილ ცალკეულ ღონისძიებებზე. უწყების ინფორმაციით, შეხვედრის მონაწილეთა მხრიდან მაღალი შეფასება მიეცა საქართველოს პრიორიტეტებს, რომელიც ეხმიანება და ხელს უწყობს ორგანიზაციის წინაშე არსებული ცალკეული გამოწვევების დაძლევას.

"განსაკუთრებული ყურადღება გამახვილდა მათ შორის 27 თებერვალს სტრასბურგში დაგეგმილ კონფერენციაზე, რომელიც საქართველოს მიერ დასახელებულ ერთ-ერთ პრიორიტეტს “გარემოს დაცვა და ადამიანის უფლებები” ეძღვნება, აღსანიშნავია, რომ ეს გახლავთ საქართველოს მხრიდან დასახელებული ინოვაციური პრიორიტეტი, რომელმაც დიდი მოწონება დაიმსახურა, როგორც ორგანიზაციის ასევე წევრი სახელმწიფოების მხრიდან. ევროპის საბჭოს გენერალურ მდივანთან შეხვედრაზე ასევე ისაუბრეს ევროპის საბჭოს მინისტრთა კომიტეტის შეხვედრის საორგანიზაციო საკითხებზე. აღსანიშნავია, რომ ევროპის საბჭოს მინისტრთა მოადგილეების კომიტეტი მინისტერიალის გამართვის ადგილთან და საორგანიზაციო საკითხებთან დაკავშირებით გადაწყვეტილებას ხვალ მიიღებს”,-აღნიშნულია გავრცელებულ ინფორმაციაში.