საგარეო საქმეთა მინისტრის დავით ზალკალიანის განცხადებით, საქართველოს ხელისუფლებამ სენატორებს დაუდასტურა, რომ არჩევნები საქართველოში ეუთო-ს სტანდარტებისა და საერთაშორისო ვალდებულებების შესაბამისად ჩატარდება.
ჟურნალისტებმა დავით ზალკალიანს მიმართეს კითხვით, სენატორ კრის სოჩის საქართველოში ჩამოსვლის შემდეგ იყო თუ არა საუბარი სანქციების შესაძლო დაწესებაზე იმ შემთხვევაში თუ ხელისუფლებასა და ოპოზიციას შორის მოლაპარაკება არ შედგებოდა.
საგარეო საქმეთა მინისტრის განცხადებით, არანაირ სანქციებზე საუბარი არ ყოფილა.
„მე მქონდა შეხვედრა სენატორებთან ჯონ რიშთან და ჯინ შაჰინთან, ჩვენი მეგობრები არიან, ძალიან დიდ პატივს ვცემთ მათ, გვქონდა ასევე თვით კრის სოჩასთანაც კომუნიკაცია და ჩვენ მათ რჩევებს აღვიქვამთ როგორც ჩვენი სტრატეგიული პარტნიორების და ჩვენი მეგობრების რჩევებს. სწორედ იმ მაღალი სტანდარტების დამკვიდრებამ განაპირობა მათი რჩევა, რომ ყველაფერი ჩატარდეს ისე, როგორც ამას აქამდე ატარებდა საქართველოს ხელისუფლება და მათ ჩვენგან მიიღეს ამის დასტური, რომ ჩვენ მართლაც ჩვენს ვალდებულებებთან შესაბამისობაში, რაც არის ეუთო/ოდირის რეკომენდაციები და ვალდებულებები, სრულ თანხვედრაში და ეუთო-ს სტანდარტების თანხვედრაში, ჩავატარებთ და არანაირ სანქციებზე არ არის საუბარი,“- განაცხადა დავით ზალკალიანმა.
ჟურნალისტები ასევე დაინტერესდნენ იყო თუ არა საერთაშორისო შეხვედრების დროს საუბარი და რეკომენდაციები საარჩევნო სისტემასთან დაკავშირებით, ზალკალიანის განმარტებით, შეხვედრებზე აღინიშნა, რომ ეს საქართველოს სუვერენული უფლებაა.
„ჩემთან შეხვედრაზე რაღაც სისტემაზე არ ყოფილა საუბარი, იყო აღნიშნული, რომ ეს არის ჩვენი სუვერენული უფლება და ის პოლიტიკური ძალები, რომლებიც არიან შესული ამ პროცესში, მათ უნდა მიაღწიონ მისაღებ ფორმულას“, - განაცხადა დავით ზალკალიანმა.