საქართველოში კორონავირუსის დაფიქსირების გამო, შესაძლოა, თბილისის ივანე ჯავახიშვილის სახელმწიფო უნივერსიტეტი ელექტრონულ სწავლებაზე გადავიდეს. თბილისის სახელმწიფო უნივერსიტეტის ადმინისტრაციის ხელმძღვანელის ლაშა საღინაძის განცხადებით, თსუ უკვე მუშაობს აღნიშნულ პროექტზე და შეეცდებიან სტუდენტებს შესთავაზონ ლექტორის მიერ ჩაწერილი აუდიო ან ვიდეო ფაილი ლექციის სახით.

„ჩვენთან ტექნოლოგიურად აღნიშნული პროცესი გამართულია. არსებულ სისტემაში ლექტორებს და სტუდენტებს შეუძლია განათავსონ, როგორც ვიდეო, ისე აუდიო და ტექსტური ფაილები. დღეს გვაქვს აკადემიური საბჭოს სხდომა, მანამდეც შიდა უწყების სხდომა გვქონდა და თუ საჭირო გახდება უზრუნველყოფთ ამ სისტემასაც. აკადემიურ საბჭოზეც განვიხილავთ ელეტრონული სწავლების თემას. კანონით არის დაშვებული როგორც პირდაპირი, ისე არაპირდაპირი კომუნიკაცია, ამ ეტაპზე განვიხილავთ ლექტორის მიერ ჩაწერილ ვიდეო ან აუდიო ლექციების განთავსებას არსებულ სისტემაში. ახლა ეს პროცესი აღნიშნული ვირუსის გამო დაჩქარდა. როდესაც ამ ტექნოლოგიას ჩვენ უფრო გავმართავთ, მომავალში ამ ვირუსის გარდა, სხვა პერიოდშიც შესაძლებობა გვექნება ჩვენ სტუდენტებს აღნიშული სერვისი შევთავაზოთ”,- განაცხადა ლაშა საღინაძემ.