10 მარტს, საქალაქო სასამართლოში 20 ივნისის საქმეზე დაკავებული ბესიკ თამლიანის სასამართლო პროცესია ჩანიშნული. თამლიანის ადვოკატის, ლევან იოსელიანის თქმით, ის ბესიკ თამლიანის პატიმრობიდან გათავისუფლებაზე იშუამდგომლებს.

„როგორც მე წინა სხდომაზე საქმის პროკურორმა განმიცხადა, ბრალდებას დარჩენილი ჰყავს რამდენიმე მოწმე, რომელთა დაკითხვაც ხვალ უნდა დასრულდეს. ეს ნიშნავს, რომ აღარ არსებობს სამართლებრივი საფუძველი ბესიკ თამლიანის პატიმრობაში დარჩენის. ის ვერ მოახდენს მოწმეებზე ზეწოლას, ხოლო მიმალვის ეჭვი არც არასდროს ყოფილა მის მიმართ. ამიტომ სასამართლოს ექნება ყველანაირი საფუძველი ბესიკ თამლიანს შეუცვალოს პატიმრობა არასაპატიმრო ღონისძიებით, რაზეც მე ხვალ აუცილებლად ვიშუამდგომლებ. არსებითად საქმის განხილვას რაც შეეხება, ჩვენ აუცილებლად მის გამართლებას მოვითხოვთ“, - აცხადებს ლევან იოსელიანი.

შეგახსენებთ, ბესიკ თამლიანს ბრალი ედება ჯგუფურ მოქმედებში მონაწილეობაში, რასაც თან ახლდა რბევა, ძალადობა, სხვისი ნივთის დაზიანება და განადგურება, ასევე ხელისუფლების წარმომადგენლისადმი წინააღმდეგობა და მათზე თავდასხმა.