ირაკლი ოქრუაშვილს ბრალი დადგენილი წესის დარღვევით აქვს წარდგენილი და არა 24 საათში, როგორც ამას კანონი მოითხოვს, - ამის შესახებ შინაგან საქმეთა ყოფილი მინისტრის, ბრალდებულ ირაკლი ოქრუაშვილის ადვოკატმა მამუკა ჭაბაშვილმა ჟურნალისტებს სასამართლო პროცესის დაწყებამდე განუცხადა.

როგორც ჭაბაშვილი განმარტავს, სახელმწიფო ბრალდებას ირაკლი ოქრუაშვილის საქმეზე მტკიცებულებები კანონის დარღვევით აქვს მოპოვებული.

„წინა სასამართლო სხდომაზე გარკვეული შუამდგომლობები დავაყენეთ, პროკურორსაც ჰქონდა შუამდგომლობა. თუმცა, მოგეხსენებათ, ზურაბ ადეიშვილის დაცვაში ახალი ადვოკატი ჩაერთო და მას საქმის გასაცნობად ვადა მისცა სასამართლომ. გასულ სხდომაზე გარკვეული მტკიცებულებების დაუშვებლობის შუამდგომლობა დავაყენეთ. ირაკლი ოქრუაშვილს ბრალი დადგენილი წესის დარღვევით აქვს წარდგენილი და არა 24 საათში, როგორც ამას კანონი მოითხოვს. ამასთან დაკავშირებით დღეს იქნება მსჯელობა და დამატებით კიდევ გვაქვს შუამდგომლობები, რომელიც ეხება საკითხის საკონსტიტუციო სასამართლოსთვის გადაცემას, ანუ სასამართლომ წარდგინებით რომ მიმართოს საკონსტიტუციო სასამართლოს გარკვეული ნორმების კონსტიტუციურობასთან დაკავშირებით. არაკანონიერად მოპოვებული მტკიცებულებაა, ტელეფონის ნომერი, რომელიც ჟვანიას საქმიდან ამოიღეს. მხოლოდ დოკუმენტების ნაწილი გადმომცეს და ტელეფონთან წვდომა არ მაქვს, რომ მასზე ექსპერტიზა ჩავატარო.როცა პროკურატურას მოვთხოვე სამხარაულის ეროვნულ ბიუროში ტელეფონი წარედგინათ, მათგან პასუხი მივიღე, რომ ამ ნივთის ბედი მათთვის უცნობია. საშუალებას არ მაძლევენ, ამ მტკიცებულებაზე წვდომა მქონდეს“, -განაცხადა ჭაბაშვილმა.

ცნობისთვის, ირაკლი ოქრუაშვილსა და ზურაბ ადეიშვილს ახალი ბრალი რამდენიმე დღის წინ წაუყენეს. ორივე მათგანს ბუტა რობაქიძის საქმეზე სამსახურეობრივი უფლებამოსილების ბოროტად გამოყენებას ედავებიან.

ირაკლი ოქრუაშვილსა და ზურაბ ადეიშვილს ბრალი საქართველოს სსკ-ის 332-ე მუხლის მესამე ნაწილის „გ“ ქვეპუნქტით (2006 წლის 31 მაისამდე მოქმედი რედაქცია) წარედგინათ, რაც სასჯელის სახედ ითვალისწინებს თავისუფლების აღკვეთას სამიდან რვა წლამდე ვადით.