სომხეთში საგანგებო მდგომარეობა გამოცხადდა. აღნიშნულ ინფორმაციას „ალ ჯაზირა“ ადგილობრივ მედიაზე დაყრდნობით ავრცელებს. მათი ცნობით, საგანგებო მდგომარეობა 16 მარტიდან 16 აპრილამდე გაგრძელდება.

საგანგებო მდგომარეობის რეჟიმი სომხეთში ითვალისწინებს საზოგადოებრივი ღონისძიებების აკრძალვას და მათში მონაწილეობას, არეგულირებს ანტიეპიდემიოლოგიური ღონისძიბების ჩატარებას, ვირუსის ნიშნების გამოვლენის შემთხვევაში მოქალაქის სპეციალურ საკარანტინო ზომებში გადაყვანას, ტრანსპორტის მოძრაობაზე კონტროლის მექანიზმების გამკაცრებას, ქვეყნის ტერიტორიაზე იმ ქვეყნის მოქალაქეების შესვლას, სადაც რთული ეპიდემიოლოგიური ვითარება შეინიშნება (გარდა დიპლომატიური წარმომადგენლობებისა და საერთაშორისო ორგანიზაციების წარმომადგენლებისა, აგრეთვე იმ მოქალაქეებისა, რომლებიც საგანგებო სიტუაციის გამოცხადების დროს ბრუნდებიან სამშობლოში). ამასთან, მოქალაქეები, რომლებიც კვეთენ სომხეთის რესპუბლიკის საზღვარს და ამავე დროს უარს ამბობენ სამედიცინო შემოწმებაზე, ჰოსპიტალიზაციაზე ან კარანტინში გადასვლაზე, შესაძლოა, დაექვემდებარონ იძულებით გადაყვანას საკარანტინო ზონებში.

ცნობისთვის, ამ დროისთვის ქვეყანაში კორონავირუსის 30 შემთხვევაა დაფიქსირებული.

იხილეთ ვიდეო: კორონავირუსის გამო სომხეთში საგანგებო მდგომარეობა გამოცხადდა