თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის, ლევან რატიანის განცხადებით, თბილისის სახელმწიფო სამედიცინო უნივერსიტეტის ინფექციურ სნეულებათა კათედრის გამგესთან შეთანხმებით, შიდა პროტოკოლი შეიმუშავეს და ახალ კორონავირუსთან საბრძოლველად მხოლოდ ორ პრეპარატს იყენებენ.
აღნიშნულთან დაკავშირებით ლევან რატიანმა ჟურნალისტებთან ისაუბრა. თუ რა პრეპარატზეა საუბარი, კლინიკის დირექტორი ამ ეტაპზე არ აკონკრეტებს.
„რაც შეეხება მარსელის ეფექტს, შეიმუშავეს პროტოკოლი და გაიდლაინი, რომელიც გულისხმობს მხოლოდ და მხოლოდ ორი პრეპარატის მიღებას. ამ ორი პრეპარატის მიღების შემდეგ, კვლევის ჩატარების შედეგად, დროის მოკლე პერიოდში პაციენტების 95%-ში სრულად გამოჯანმრთელება მიიღეს. პერიოდი განისაზღვრება 10-დან 14-დღემდე. ქალბატონ ელზასთან შეთანხმებით, რომელიც გახლავთ თბილისის სახელმწიფო სამედიცინო უნივერსიტეტის ინფექციურ სნეულებათა კათედრის გამგე, შევიმუშავეთ შიდა პროტოკოლი და ამ პროტოკოლით ვხელმძღვანელობთ დღემდე. პრეპარატის დასახელებისგან ამ ეტაპზე თავს შევიკავებ“, - განაცხადა რატიანმა.
