მსგავსი სახის გამოწვევა ბოლო ათწლეულების განმავლობაში არ ყოფილა, - ამის შესახებ პრემიერ-მინისტრმა გიორგი გახარიამ დღეს გამართულ ბრიფინგზე განაცხადა.
როგორც მან გამარტა, კორონავირუსზე გამარჯვებისთვის უკიდურესად მნიშვნელოვანია ზედმიწევნით, ზუსტად შევასრულოთ თვითიზოლაციისა და სამოქალაქო დისტანციის მოთხოვნები იმისთვის, რომ ვირუსის მასობრივი და სწრაფი გავრცელება ავირიდოთ თავიდან.
„ერთი რამე მინდა გითხრათ და ყველამ ეს უნდა გავიაზროთ, თითოეულმა მოქალაქემ. მსგავსი სახის გამოწვევა ბოლო ათწლეულების განმავლობაში არ ყოფილა. ისევე როგორც გლობალურად, მსგავსი სახის სიმძიმის გამოწვევა მსოფლიოს არ ჰქონია და ამას აღიარებს ყველა. ჩვენ ყველამ უნდა გავიაზროთ ერთი რამ. ჩვენ ვართ შეზღუდული ეკონომიკური პოტენციალის და ჯერჯერობით, სამწუხაროდ, საკმაოდ ღარიბი ქვეყანა. ჩვენთვის უკიდურესად მნიშველოვანია ამ ვირუსზე გამარჯვებისთვის ზედმიწევნით, ზუსტად შევასრულოთ ის თვითიზოლაციისა და სამოქალაქო დისტანციის მოთხოვნები, რომლებიც ჩვენ შემთხვევაში არის ყველაზე მარტივი შესასრულებელი იმისთვის, რომ ვირუსის მასობრივი და სწრაფი გავრცელება ავირიდოთ თავიდან. წინააღმდეგ შემთხვევაში ჩვენ რისკის ქვეშ ვაყენებთ თითოეული ჩვენი მოქალაქის, ჩვენი ოჯახის წევრის ჯანმრთელობასა და კეთილდღეობას“,-განაცხადა გიორგი გახარიამ.