არასამთავრობო ორგანიზაცია "სამოქალაქო იდეა" კამპანიას- #გადავარჩინოთსამუშაო ადგილები იწყებს. როგორც “ინტერპრესნიუსს” ორგანიზაციიდან აცნობეს, მზად არიან ასეთ ვითარებაში ბიზნესს სექტორს მხარში დაუდგნენ.

„ამ ძნელბედობის ჟამს, დარწმუნებული ვარ ყველა ვფიქრობთ, როგორ ვიპოვოთ გამოსავალი და დავეხმაროთ საკუთარ თავსაც და ქვეყანასაც. ჩვენ ვიწყებთ კამპანიას #გადავარჩინოთსამუშაოადგილები. გვსურს ჩვენი წვლილი შევიტანოთ ბიზნესის დახმარებაში და დავეხმაროთ ადამიანებს არ დაკარგონ სამსახური“, - აცხადებს "სამოქალაქო იდეის" თავმჯდომარე თინათინ ხიდაშელი.

მისივე თქმით, კამპანიის არსი მდგომარეობს შემდეგში - წლის მანძილზე უამრავი ღონისძიება იყო დაგეგმილი, რომელიც გაუქმებული ან გადადებულია. ბიზნესის შემხვედრი ნაბიჯების და თანხმობის პირობებში, ყველამ ვისაც ასეთი ღონისძიება აქვს მომავალში დაგეგმილი, ეს იქნება არასამთავრობო სექტორი, თუ სახელმწიფო უწყებები, ე.წ სასაჩუქრე სერთიფიკატის პრინციპით, წინასწარ უნდა შეიძინოს საკონფერენციო, სასტუმროსა და რესტორნების მომსახურება, ჩვეულებრივ პირობებში 12 თვიანი გამოყენების შესაძლებლობით. "სამოქალაქო იდეა" მზად არის ამ მძიმე ჟამს მხარში დაუდგეს ბიზნესს და მოუწოდებს ყველა დანტერესებულ ორგანიზაციას შემოუერთდნენ კამპანიას #გადავარჩინოთსამუშაოადგილები.