„დიდი ოცეულის“ წევრი სახელმწიფოები 5 ტრილიონ დოლარს ჩადებენ მსოფლიო ეკონომიკაში ფინანსური ზიანის დასაძლევად, რაც კორონავირუსს უკავშირდება. ამის შესახებ „დიდი ოცეულის“ სახელმწიფოთა მეთაურების სამიტის შემაჯამებელ განცხადებაშია აღნიშნული, რომელიც დღეს ვიდეოკონფერენციის ფორმატით გაიმართა.
მასში ხაზგასმულია, რომ ლიდერები ვალდებულებას იღებენ, ყველაფერი გააკეთონ და ყველა შესაძლებლობა გამოიყენონ იმისთვის, რომ მინიმუმამდე დაიყვანონ ეკონომიკური და სოციალური ზარალი, რომელიც კორონავირუსით არის გამოწვეული.
„დიდი ოცეულის“ ლიდერები მიჩნევენ, რომ ასეთი ზომები ხელს შეუწყობს მსოფლიო ეკონომიკას სწრაფად დადგეს ფეხზე და მყარი საფუძველი ჩაუყაროს სამუშაო ადგილების შენარჩუნებას და ეკონომიკური ზრდის აღდგენას.
ლიდერები თავიანთი ქვეყნების ფინანსთა მინისტრებსა და ცენტრალური ბანკების მმართველებს დაავალებენ რეგულარულად განახორციელონ ქმედებების კოორდინაცია კორონავირუსის პანდემიაზე ოპერატიული რეაგირებისთვის, ასევე მჭიდრო ურთიერთობები დაამყარონ საერთაშორისო ორგანიზაციებთან მათთვის ფინანსური დახმარების დროულად მიწოდებაზე.