ინფექციურ საავადმყოფოში აცხადებენ, რომ კორონავირუსით ინფიცირებული 2 პაციენტის მდგომარეობა კვლავ კრიტიკულია
თბილისის ინფექციური საავადმყოფოს სამედიცინო დირექტორის მარინა ეზუგბაიას განცხადებით, კორონავირუსით ინფიცირებული 2 პაციენტის მდგომარეობა კვლავ კრიტიკულია.
„მდგომარეობა ჯერჯერობით უცვლელია. შემიძლია, ვთქვა, რომ დილის შემდეგ დღის განმავლობაში 2 კრიტიკული პაციენტის მდგომარეობა არ შეცვლილა და მათი მდგომარეობა ჯერჯერობით არასტაბილურია. აქედან გამომდინარე მათი მდგომარეობის პროგნოზირება შეუძლებელია. დანარჩენი 3 პაციენტის მდგომარეობა სტაბილიზირებულია. პაციენტი, რომელიც გუშინ დამძიმდა და ინტენსიური თერაპიის განყოფილებაში გადავიყვანეთ, მისი მდგომარეობა დღეს უკვე დასტაბილურდა და იმედია გაუმჯობესდება“,-განაცხადა ეზუგბაიამ ჟურნალისტებთან ინიფიცირებული პაციენტების ჯანმრთელობის მდგომარეობაზე საუბრისას.
მისივე ინფორმაციით, დანარჩენი პაციენტების მდგომარეობა სხვადასხვა სიმძიმისაა. უმეტესობა კი მსუბუქი მიმდინარეობისაა. ამასთან რამდენიმე პაციენტია მძიმე და არამძიმედ მიმდინარე პნევმონიით.
ცნობისთვის, საქართველოში ახალი კორონავირუსით ინფიცირებულთა რაოდენობა 117-ს შეადგენს, ხოლო მათგან გამოჯანმრთელებულია უკვე 23 ადამიანი.
v-if="article.gallery" v-html="article.gallery"
