პირველკლასელთა რეგისტრაციის პროცესი გამოცხადებული ვადებით გაგრძელდება

პირველკლასელთა რეგისტრაციის პროცესი გამოცხადებული ვადებით გაგრძელდება. ამის შესახებ „ინტერპრესნიუსთან“ ინტერვიუში საქართველოს განათლების, მეცნიერების, კულტურისა და სპორტის მინისტრის მოადგილემ, ეკატერინე დგებუაძემ განაცხადა. როგორც დგებუაძე აღნიშნავს, ყველა მოსწავლე, ვინც რეგისტრაციას გაივლის, სკოლაში ჩაირიცხება.

„რეგისტრაციის პირველი ეტაპი დასრულებულია, რომელიც ეხებოდა საგანმანათლებლო საჭიროების მქონე მოსწავლეებს. სკოლებში ჩარიცხული იქნება ყველა რეგისტრირებული ბავშვი აპრილის ბოლოს და ჩვეულებრივ გამოცხადებული ვადებით გავაგრძელებთ პირველკლასელთა რეგისტრაციას“, - განაცხადა დგებუაძემ.

შეგახსენებთ, რომ პირველ ეტაპზე, პროცესი 2 მარტს დაიწყო და16 მარტის ჩათვლით სპეციალური საგანმანათლებლო საჭიროების მქონე პირები დარეგისტრირდნენ.

რეგისტრაციის მეორე ეტაპი, 27 აპრილიდან 8 მაისის ჩათვლით იქნება შესაძლებელი და სკოლაში დარეგისტრირდებიან ის ბავშვები, რომელთა: და-ძმა სწავლობს ამ სკოლაში; მშობელი სკოლის თანამშრომელია; ოჯახიდან ერთდროულად ორი ან მეტი ბავშვი შედის პირველ კლასში.ამ ეტაპზე რეგისტრაცია ხორციელდება საჯარო სკოლებში მშობლის/კანონიერი წარმომადგენლის მიერ ჩასარიცხად აუცილებელი დოკუმენტაციის წარდგენის საფუძველზე. რეგისტრაციას უზრუნველყოფს საჯარო სკოლა.

მესამე ეტაპი - საყოველთაო რეგისტრაცია - 13 მაისიდან დაიწყება და 5 ივნისის ჩათვლით გაგრძელდება.

რეგისტრაცია განხორციელდება განათლების მართვის საინფორმაციო სისტემის ოფიციალურ ვებგვერდზე www.emis.ge. რეგისტრაციას უზრუნველყოფს მშობელი/კანონიერი წარმომადგენელი. ელექტრონულად რეგისტრირებული მოსწავლის ჩასარიცხად აუცილებელი დოკუმენტაციის წარდგენა 8 ივნისიდან 22 ივნისის ჩათვლით განხორციელდება. დადგენილ ვადებში დოკუმენტაციის წარუდგენლობის შემთხვევაში, რეგისტრაცია ავტომატურად გაუქმდება.

მეოთხე ეტაპი 24 ივნისიდან 10 ივლისის ჩათვლით სკოლებში განხორციელდება. ამ ეტაპზე გამოთავისუფლებულ ვაკანტურ ან დარჩენილ თავისუფალ ადგილებზე იმ მოსწავლეების რეგისტრაცია მოხდება, რომლებიც ვერ დარეგისტრირდნენ I, II და III ეტაპებზე, ან სურთ რეგისტრაციის შეცვლა.

იხილეთ ინტერვიუს სრული ვერსია