საქართველოს საგარეო საქმეთა მინისტრის დავით ზალკალიანის შეფასებით, ამერიკის შეერთებული შტატები ძლიერი პარტნიორები არიან და პარტნიორობა კიდევ გაძლიერდება ამ რთულ დროში ერთად დგომით.
დავით ზალკალიანი სოციალურ ქსელ "ტვიტერზე" თბილისის ანძის აშშ-ის დროშის ფერებში განათებას ეხმაურება, ანძის ფოტოებს აქვეყნებს და წერს, რომ აღნიშნულით საქართველომ სოლიდარობა გამოხატა.
"დღეს თბილისის ანძა აშშ-ის დროშის ფერებში აინთო, რომ გამოეხატა სოლიდარობა ამ ქვეყნის მიმართ, როცა ის COVID19-თან ბრძოლას განაგრძობს. საქართველო და აშშ ძლიერი პარტნიორები არიან და ეს პარტნიორობა ახლა კიდევ უფრო გაძლიერდება ერთად დგომის შესაძლებლობით ამ რთულ პერიოდში",- წერს ზალკალიანი "ტვიტერზე".
დღეს კორონავირუსთან ბრძოლაში ამერიკის შეერთებული შტატების მხარდასაჭერად, თბილისის ანძა ამერიკის დროშის ფერებში განათდა.
„საქართველო მუდამ იყო და არის ამერიკის შეერთებული შტატების გვერდით! ჩვენ გვჯერა ამერიკის გამარჯვების! - ამ მესიჯს საქართველო თავის სტრატეგიულ პარტნიორს უგზავნის“ , - ნათქვამია თბილისის მერიის მიერ გავრცელებულ ინფორმაციაში.
ცნობისთვის, რამდენიმე დღის წინ, საქართველომ მსგავსი სოლიდარობა იტალიელ და ესპანელ ხალხსაც გამოუცხადა და სიმბოლურად, თბილისის ანძა ესპანეთისა და იტალიის დროშის ფერებში გაანათა.