მიმდინარე წელს ილიაუნისა და ბაზისბანკის STEM-სასტიპენდიო ფონდი გაიზარდა და 30 000 ლარს შეადგენს
მიმდინარე წელს ილიაუნისა და ბაზისბანკის STEM-სასტიპენდიო ფონდი გაიზარდა და 30 000 ლარს შეადგენს.
როგორც „ინტერპრესნიუსს“ ილიას სახელმწიფო უნივერსიტეტიდან აცნობეს, ფონდი თხუთმეტ 2000-ლარიან სასტიპენდიო ვაუჩერს გასცემს ერთიან ეროვნულ გამოცდებზე წარმატებული აბიტურიენტებისთვის, რომლებიც სწავლას ილიას სახელმწიფო უნივერსიტეტში სან დიეგოს სახელმწიფო უნივერსიტეტის საერთაშორისო აკრედიტაციის საბაკალავრო პროგრამებზე გააგრძელებენ.
„კერძოდ, 2000-ლარიან STEM-სტიპენდიას მიიღებს აბიტურიენტი, თუ: 2020 წელს ჩააბარებს ილიას სახელმწიფო უნივერსიტეტის საბაკალავრო პროგრამებზე, რომლებიც სან დიეგოს სახელმწიფო უნივერსიტეტთან თანამშრომლობით შემუშავდა საერთაშორისო ABET აკრედიტაციის მოთხოვნების მიხედვით:
ინგლისრენოვანი კომპიუტერული ინჟინერია - 0100117
ინგლისურენოვანი სამოქალაქო ინჟინერია - 0100115
ინგლისურენოვანი ელექტრული და ელექტრონული ინჟინერია - 0100118
და ერთიანი ეროვნული გამოცდების ქულებით იქნები აღნიშნულ პროგრამებზე ჩარიცხულ ყველაზე მაღალი ქულების მქონე 15 პირველკურსელს შორის.
STEM-სტიპენდიით სარგებლობის დამატებითი პირობები:
თუ აბიტურიენტი ილიაუნის სასტიპენდიო ვაუჩერის მიღების ერთზე მეტ პირობას (იხ. სასტიპენდიო ვაუჩერის მიღების სხვა პირობების შესახებ ინფორმაცია აქ) დააკმაყოფილებს, დაჯილდოვდება თანხობრივად უკეთესი პირობების მქონე, მაგრამ 1 სასტიპენდიო ვაუჩერით. ასევე, ილიაუნის 2000-ლარიან STEM-სტიპენდიას მიიღებს აბიტურიენტი იმ შემთხვევაშიც, თუ მიიღებს სახელმწიფოსგან 100%-იან დაფინანსებას.
ილიას სახელმწიფო უნივერსიტეტისა და ბაზისბანკის STEM-სასტიპენდიო ფონდი 2016 წელს შეიქმნა. ფონდის მიზანია სან დიეგოს სახელმწიფო უნივერსიტეტის საერთაშორისო აკრედიტაციის საბაკალავრო პროგრამები ხელმისაწვდომი გახადოს STEM-მიმართულებებით დაინტერესებული აბიტურიენტებისთვის.
2020 წელს ილიაუნისა და ბაზისბანკის STEM-სასტიპენდიო ფონდის მოცულობა გაიზარდა და 30 000 ლარს შეადგენს. ფონდი თხუთმეტ 2000-ლარიან სასტიპენდიო ვაუჩერს გასცემს ერთიან ეროვნულ გამოცდებზე წარმატებული აბიტურიენტებისთვის, რომლებიც სწავლას ილიას სახელმწიფო უნივერსიტეტში სან დიეგოს სახელმწიფო უნივერსიტეტის საერთაშორისო აკრედიტაციის საბაკალავრო პროგრამებზე გააგრძელებენ”, - აღნიშნულია ინფორმაციაში.
