თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის, ლევან რატიანის განცხადებით, 55 კოვიდინფიცირებული პაციენტიდან 33-ს მწვავე პნევმონია აღენიშნება.

მისივე თქმით, სტაბილურია 3 მოზარდის და 2 ორსულის მდგომარეობა. ამასთან, პირველ საუნივერსიტეტო კლინიკას დღეს 2 გამოჯანმრთელებული პაციენტი დატოვებს.

„გვყავს 3 მოზარდი, მათი მდგომარეობა ამ ეტაპამდე სტაბილურია, არანაირ სიმპტომურ ჩარევას არ საჭიროებს. ასევე გვყავს 2 ორსული, ერთი არის 24 კვირის და როგორც ნაყოფის, ასევე დედის მდგომარეობა სტაბილურია და შეესაბამება ფიზიოლოგიურ პარამეტრებს. ასევე სტაბილურია 9 კვირის ორსული ქალის მდგომარეობა.

ჯამში გვყავს 55 პაციენტი, აქედან 33 - ფილტვის ხელოვნური ვენტილაციით, მწვავე პნევმონიით და მკურნალობა გრძელდება სახელმწიფო პროტოკოლის და ჩვენი პროტოკოლის მიხედვით.

დღეს უარყოფითი დასკვნა მოვიდა 2 პაციენტზე და ისინი დატოვებენ კლინიკას,“ - აღნიშნა ლევან რატიანმა.