„მუნიციპალური ახალგაზრდული პოლიტიკის“ ფარგლებში, ახალგაზრდობის სააგენტომ რეგიონებში ახალგაზრდული ეკოსისტემის განვითარების მიზნით, 10 რეგიონის 11 საპილოტე მუნიციპალიტეტის თანამშრომლების გადამზადება დისტანციურად დაიწყო.

როგორც „ინტერპრესნიუსს“ ახალგაზრდობის სააგენტოდან აცნობეს, პროექტის მიზანია ადგილობრივად მომზადნენ პროფესიონალები, ე.წ. „მუნიციპალური ახალგაზრდული მუშაკები“ (Municipal Youth Worker), რომლებიც შეძლებენ ადგილზე გაუწიონ კოორდინაცია ახალგაზრდობის საჭიროებების კვლევის ჩატარებას, შეიმუშავებენ ახალგაზრდული პოლიტიკის დოკუმენტსა და სამოქმედო გეგმას.

მათი ცნობით, მუნიციპალიტეტების წარმომადგენლების ახალგაზრდულ მუშაკად გადამზადება ოთხ ეტაპად მიმდინარეობს.

„პირველი ეტაპი ერთკვირიან ტრენინგ კურსს მოიცავს, რომელიც ქვეყანაში კორონავირუსის გავრცელების გათვალისწინებით დისტანციურ რეჟიმში წარიმართება. ტრენინგს მოწვეული ექპერტები წარუძღვებიან, რომლებიც მონაწილეებს კომპეტენციების გაუმჯობესებაში დაეხმარებიან და იმ ცოდნასა და გამოცდილებას გადასცემენ, რაც მათ “მუნიციპალრი ახალგაზრდული პოლიტიკის” ფარგლებში განსახორციელებელ საქმიანობაში დაეხმარებათ. მუნიციპალიტეტების თანამშრომლებს, საქმიანობის წარმატებით განხორციელებში, სტრასბურგის ტრენინგ ცენტრში ხუთდღიან ტრენინგზე მიღებული გამოცდილებაც გაუმყარებთ, სადაც ისინი მიმდინარე წლის მარტის თვეში სააგენტოს წარდგენით იმყოფებოდნენ. მუნიციპალური ახალგაზრდული პოლიტიკა ახალგაზრდობის სააგენტოს სამწლიანი რეფორმის ერთ–ერთი ძირითადი მიმართულებაა, რომლის მიზანია საქართველოს ათივე რეგიონში მუნიციპალიტეტების დონეზე ეკოსისტემების შექმნით, ახალგაზრდობის სფეროს მთლიანი ეკოსისტემის შექმნა. სამიზნე მუნიციპალიტეტების შესარჩევად, სააგენტო 10-ვე რეგიონის 64–ვე მუნიციპალიტეტს ეწვია და ადგილზე გაეცნო ახალგაზრდულ სფეროში არსებულ საჭიროებებს, გაითვალისწინა მათი გამოწვევები და სფეროს ექსპერტების“,- აღნიშნულია ინფორმაციაში.