ფაბლაბილიაუნი სკოლის მოსწავლეებისთვის გრაფიკული დიზაინის ონლაინ ტრენინგის კურსს იწყებს, რომელიც მათ საშუალებას მისცემს, შინიდან გაუსვლელად შეძლონ სასურველი კურსის შესწავლა და გლობალურ პლატფორმაზე მუშაობა. როგორც „ინტერპრესნიუსს“ ილიაუნიდან აცნობეს, კურსის განმავლობაში მონაწილეები Adobe Illustrator CC-ს შეისწავლიან.

მათივე ცნობით, კურსის გავლა შეუძლიათ საჯარო და კერძო სკოლების მე-10, მე-11 და მე-12 კლასის მოსწავლეებს. პროექტში მონაწილეობის მისაღებად საჭიროა მარტივი სააპლიკაციო ფორმის შევსება არაუგვიანეს 2020 წლის 30 აპრილისა.

სააპლიკაციო ფორმა: https://forms.gle/UGjTU4Z6Ptmf7o7RA.

ადგილების რაოდენობა შეზღუდულია, პროექტში მონაწილეობა შეუძლია 50 მოსწავლეს. შერჩეულ კანდიდატებს 2020 წლის 5 მაისამდე დაუკავშირდებიან.

„დღეს განსაკუთრებით აქტუალური გახდა დისტანციური მუშაობის კულტურა, თანამედროვე პროფესიების განვითარება, რაც საშუალებას აძლევს ადამიანს, შინიდან გაუსვლელად, მისთვის მოსახერხებელ გარემოში იმუშაოს ან გლობალურ ბაზარზე დასაქმება შეძლოს. გრაფიკული დიზაინი კი სწორედ ასეთ პროფესიათა შორისაა. გრაფიკული დიზაინი, რომელსაც „ვიზუალურ კომუნიკაციას“ უწოდებენ, გვეხმარება ჩვენსა და გრაფიკულ ნამუშევრებს შორის ჰარმონიული ურთიერთობის დამყარებაში. მას სხვადასხვა ინფორმაციის შესაბამისი ფორმით მოწოდება შეუძლია, ამიტომაც თანამედროვე სამყაროში დიდი ადგილი უკავია“,-აღნიშნულია გავრცელებულ ინფორმაციაში.