სპარსეთის ყურე ეკუთვნის ირანს და მას მუდამ სპარსეთის ყურე ერქმევა, - ამის შესახებ ირანის პრეზიდენტმა, ჰასან როუჰანიმ მთავრობის წინაშე სიტყვით გამოსვლის დროს განაცხადა.
„ამერიკელებმა უნდა გაიგონ, რომ ეს ყურე სადმე ნიუ-იორკში და ვაშინგტონში არ მდებარეობს. გაიგეთ, ეს სპარსეთის ყურეა და არა ნიუ-იორკის ყურე“,-დასძინა როუჰანიმ.
მისი თქმით, ირანი ყოველთვის იცავდა და დაიცავს აღნიშნულ წყლებს.
„აშშ მოწმე გახდა ირანელი ხალხის წარმატების ბევრი მიმართულებით. ჩვენი ჯარისკაცები, ჩვენი გუშაგები, არმია და პოლიცია ყოველთვის იცავდა და დაიცავს ჩვენს წყლებს“,- აღნიშნა როუჰანიმ.
ცნობისთვის, გასულ კვირას სპარსეთის ყურეში ამერიკულ და ირანულ სამხედრო გემებს შორის გარკვეული დაძაბულობა შეინიშნებოდა. შტატების 6 სამხედრო გემი საერთაშორისო წყლებში წვრთნებს გადიოდა, რა დროსაც მათ ირანის რევოლუციური გვარდიის ფლოტი აედევნა. ამერიკის საზღვაო ძალების ინფორმაციით, ირანული გემები მათი ხომალდების გარშემო დიდი სისწრაფით, ახლო მანძილზე გადაადგილდებოდნენ, რაც, მათი თქმით, პროვოკაციულია და შეტაკების შესაძლებლობას აჩენს.
მოგვიანებით, ირანშიც განაცხადეს, რომ საფრთხის შემთხვევაში, ისინი ამერიკულ ხომალდებს ცეცხლს გაუხსნიდნენ.