პარლამენტის თავმჯდომარის მოადგილემ, კახა კუჭავამ, საქართველოში ევროკავშირის ელჩთან, კარლ ჰარცელთან, ონლაინ შეხვედრა გამართა. ამის შესახებ „ინტერპრესნიუსს“ საქართველოს პარლამენტიდან აცნობეს. მხარეებმა კოვიდ-19 -თან დაკავშირებით არსებულ სიტუაციაზე ისაუბრეს. კახა კუჭავამ ევროკავშირის ელჩს მიაწოდა ინფორმაცია იმის შესახებ, თუ რა რეფორმები აქვს საქართველოს დაგეგმილი ამ მიმართულებით და როგორ ხორციელდება ისინი, როგორია ქვეყანაში სტატისტიკა კოვიდ-19 -თან მიმართებაში და ა.შ.

მათ ასევე ისაუბრეს, ზოგადად, ეკონომიკურ პროგრამაზე და იმ შესაძლებლობებზე, როდესაც ქვეყანა შეძლებს უფრო აქტიურად დაუბრუნდეს ცხოვრების ჩვეულ რეჟიმს.

პარლამენტის თავმჯდომარის მოადგილემ მადლობა გადაუხადა ევროკავშირის ელჩს იმ თანადგომისთვის, რომელსაც ის ჩვენი ქვეყნის მიმართ იჩენს.

„შეხვედრაზე ყურადღება, ბუნებრივია, დაეთმო ოკუპირებულ ტერიტორიებთან დაკავშირებულ იმ პრობლემებს, რომლებსაც ოკუპანტი ქვეყანა იყენებს თავის სასარგებლოდ მაშინ, როცა ყველა ებრძვის ამ უხილავ მტერს, ცდილობენ უფრო აგრესიულად იმოქმედონ ქვეყნის წინააღმდეგ. ელჩმა კიდევ ერთხელ გამოუცხადა საქართველოს სრული მხარდაჭერა და თანადგომა ამ საკითხთან მიმართებაში“, - განაცხადა კახა კუჭავამ ონლაინ შეხვედრის შემდეგ.