რაჭა-ლეჩხუმისა და ქვემო სვანეთის სახელმწიფო რწმუნებული, არჩილ ჯაფარიძე ონის მუნიციპალიტეტში, გამყოფი ხაზის მიმდებარე სოფელ წედისში იმყოფებოდა და იქ მცხოვრებ ოჯახებს შეხვდა.

როგორც „ინტერპრესნიუსს“ რაჭა-ლეჩხუმისა და ქვემო სვანეთის სახელმწიფო ადმინისტრაციიდან აცნობეს, რწმუნებულმა მოსახლეობისგან არსებული საჭიროებების შესახებ დეტალური ინფორმაცია მიიღო. მათივე ცნობით, როგორც შეხვედრაზე აღინიშნა, ადგილობრივებს არც საკვებისა და არც მედიკამენტების მომარაგების კუთხით პრობლემები არ აქვთ, ჯანდაცვის სამინისტროს რეკომენდაციებსაც იცავენ და სრულყოფილი ინფორმაცია მიეწოდებათ კორონავირუსის პრევენციულ ღონისძიებებთან დაკავშირებით.

უწყების ინფორმაციით, სახელმწიფო რწმუნებული სოფელში, თერმოსკრინინგის მიმდინარეობას ონის მუნიციპალიტეტის მერის მოვალეობის შემსრულებელთან, ეკა მაისურაძესთან ერთად გაეცნო და ექიმებს გაესაუბრა. არჩილ ჯაფარიძემ წედისში მცხოვრებ მოსახლეობას ქართული წარმოების პირბადეები გადასცა და სამომავლო გეგმებსა და საჭიროებებზე მათთან ერთად იმსჯელა.