თინა ბოკუჩავა - ეპიდემიოლოგიური სიტუაცია გვაძლევს იმის შესაძლებლობას, რომ სოციალური დისტანციის დაცვით, სხვადასხვა ტიპის საპროტესტო მოქმედებები დავგეგმოთ

ჩემი აზრით, ეპიდემიოლოგიური სიტუაცია გვაძლევს იმის შესაძლებლობას, რომ დავგეგმოთ, მათ შორის სოციალური დისტანციის დაცვით, სხვადასხვა ტიპის საპროტესტო მოქმედებები,- ამის შესახებ „ნაციონალური მოძრაობის" წევრმა თინა ბოკუჩავამ ჟურნალისტებს „ლეიბორისტული პარტიის“ ოფისში გამართული შეხვედრის დასრულების შემდეგ განუცხადა.

„აქციებს რაც შეეხება, მესმის, რომ ინტერესი არსებობს ამასთან დაკავშირებით. ჩვენ უნდა ვიმოქმედოთ გონივრულად, უნდა ვიმოქმედოთ ეპიდემიოლოგიური მოცემულობიდან გამომდინარე იმიტომ, რომ ადამიანების სიცოცხლე და ჯანმრთელობა ის უპირველესი ფასეულობაა, რაც ყველა პოლიტიკურმა პარტიამ უნდა გაითავისოს საკუთარი გადაწყვეტილებებისას, თუმცა, ამჟამინდელი ეპიდემიოლოგიური სიტუაცია ჩემი აზრით გვაძლევს იმის შესაძლებლობას, რომ დავგეგმოთ, მათ შორის სოციალური დისტანციის დაცვით საპროტესტო სხვადასხვა ტიპის მოქმედებები იმისთვის, რომ წნეხი, საერთაშორისო წნეხთან ერთად მათ შორის იყოს ქვეყნის შიგნით, რომ ივანიშვილს ვაიძულოთ 8 მარტის შეთანხმების შესრულება“,-აღნიშნა ბოკუჩავამ.