ისანი-სამგორის სოციალური სააგენტოს სერვისცენტრში ხმაური იყო. ისანი-სამგორის სოციალური მომსახურების სააგენტოს ხელმძღვანელის მოადგილეს დავით ცაგურიშვილს ერთ-ერთი ბენეფიციარი შვილის ცემაში ადანაშაულებს. სააგენტოში სოციალურად დაუცველი ოჯახი მოხსნილი დახმარების აღდგენის თხოვნით მივიდა, რის შემდეგაც დაპირისპირება მოხდა.

ბენეფიციარი მაია ასადური აცხადებს, რომ მის შვილს ხელფასი დაერიცხა, რის შემდეგაც სარეიტინგო ქულა გაეზარდათ და დახმარება მოეხსნათ.

ჩხუბის ფაქტს უარყოფს სააგენტოს ხელმძღვანელის მოადგილე. “მე დავარტყი? როგორ გეკადრებათ? თუ არსებობს კადრები, მაჩვენეთ ის კადრი... როგორ მაჩვენებთ, რაც არ იყო”, - განუცხადა ჟურნალისტებს ცაგურიშვილმა.

სააგენტოს ერთ-ერთი თანამშრომელი კი აცხადებს, რომ ბენეფიციარს მაღალი სარეიტინგო ქულა ჰქონდა, რამაც მისი უკმაყოფილება გამოიწვია და მას შემდეგ, რაც დაკვალიანება სცადა, ბენეფიციარი აგრესიაზე გადავიდა.