ეკა ბესელია - ვიდრე სამივე მოსმენით არ იქნება მიღებული ცვლილებები და სისტემა არ შეიცვლება, იქამდე განსაკუთრებული სიფრთხილე და მობილიზება გვჭირდება

ვიდრე სამივე მოსმენით არ იქნება მიღებული საკონსტიტუციო ცვლილებები და სისტემა არ შეიცვლება, იქამდე გვჭირდება განსაკუთრებული სიფრთხილე და მობილიზება , - ამის შესახებ საქართველოს პარლამენტის დამოუკიდებელმა დეპუტატმა ეკა ბესელიამ ჟურნალისტებს პარლამენტში განუცხადა.

მისი თქმით, მისასალმებელია იმ პარტიების პოზიცია, რომლებმაც კენჭისყრაში მონაწილეობის არმიღებაზე პოზიცია შეცვალეს და კენჭისყრას დაესწრებიან.

"დღევანდელი კენჭისყრა მართლაც ძალიან მნიშვნელოვანია იმისათვის, რომ მშვიდობიანად მივიდეთ არჩევნებამდე. მე, პირადად მიხარია, რომ იმ პარტიებმა, ვინც ამბობდა, რომ კენჭისყრაში არ იღებდა მონაწილეობას, გადახედეს თავიანთ გადაწყვეტილებას და შეცვალეს პოზიცია. ეს სწორია, იმიტომ, რომ არავითარი კითხვის ნიშანი, არანაირი საფრთხე არ უნდა გააჩინოს. არ უნდა გავაჩინოთ კითხვები, რომ კენჭისყრამდე, შეიძლება, რაიმე მოხდეს. ამიტომ, პირადად მგონია, რომ ვინც ბოლო მომენტში შეცვალა პოზიცია და შეწყვიტა ბოიკოტი ოპოზიციური პარტიებიდან, ეს დააზღვევს იმ რისკებს, რაზეც ვლაპარაკობდით. ეს დააზღვევს იმ რისკებს, რომ შეიძლება, რაღაც მომხდარიყო გაუთვალისწინებელი კენჭისყრის პროცესში. ამიტომ, ახლა, ალბათ სრულიად გამორიცხულია, რომ რაიმე მოხდეს, იმიტომ, რომ საკმარისია იმ ხმების გათვალისწინებით, რისი მობილიზებაც ხდება პირველი მოსმენით იყოს მიღებული, მაგრამ ვიდრე სამივე მოსმენით არ იქნება მიღებული ეს ცვლილებები და სისტემა არ შეიცვლება, იქამდე გვჭირდება განსაკუთრებული სიფრთხილე და მობილიზება" , - განაცხადა ბესელიამ.