თბილისის საქალაქო სასამართლოში "კანონიერი ქურდობის“, „ქურდული სამყაროს“ წევრობის, „ქურდული სამყაროს“ წევრისთვის მიმართვისა და „ქურდული სამყაროს“ საქმიანობის მხარდაჭერის ბრალდებით დაკავებული პირების სასამართლო პროცესი მიმდინარეობს.

დღევანდელ სხდომაზე ბრალდებულების მიმართ აღკვეთის ღონისძიების შეფარდებაზე იმსჯელებენ. როგორც საქმის პროკურორი გიორგი მუკბანიანი აცხადებს, პროკურატურა ბრალდებულების მიმართ, აღკვეთის ღონისძიების სახით პატიმრობის გამოყენებას მოითხოვს.

"განჩინების საფუძველზე დაკავებული იქნა 6 ადამიანი. ერთი კი უკვე მოთავსებულია პენიტენციურ დაწესებულებაში, მას პატიმრობა შეფარდებული აქვს სხვა სისხლის სამართლის საქმეზე. სამი ბრალდებული კი არ იმყოფება საქართველოს ტერიტორიაზე. მათ მიმართაც ვითხოვთ პატიმრობას და გამოცხადდება ძებნა. ლ.დ. ისევე, როგორც 9 ბრალდებული, ჩართული იყო ქურდული სამყაროს მიზნების განხორციელებაში და უკანონოდ აკისრებდნენ მოქალაქეებს თანხების გადახდას. ელმირა წულაიას მიმართ არ არის ბრალი წარდგენილი, სწორედ ლ.დ. არის დაკავშირებული ქურდულ სამყაროსთან და ელმირა წულაიასთან. ამ ეტაპზე არ არის წულაიას მიმართ ბრალის წარდგენისთვის საკმარისი მტკიცებულება", - განაცხადა მუკბანიანმა.

ცნობისთვის, შინაგან საქმეთა სამინისტროს ცენტრალური კრიმინალური პოლიციის დეპარტამენტის თანამშრომლებმა, გენერალურ პროკურატურასთან ერთად თბილისსა და აჭარის რეგიონში ერთდროულად ჩატარებული კომპლექსური სპეციალური ოპერატიული ღონისძიებების შედეგად, „კანონიერი ქურდობის“, „ქურდული სამყაროს“ წევრობის, „ქურდული სამყაროს“ წევრისთვის მიმართვისა და „ქურდული სამყაროს“ საქმიანობის მხარდაჭერის ბრალდებით 6 პირი დააკავეს, ხოლო 4 პირი სისხლის სამართლებრივ პასუხისგებაში მისცეს.