„ნაციონალური მოძრაობის" ერთ-ერთი წევრი, სალომე სამადაშვილი რეგულარული საჰაერო მიმოსვლის გადადების საკითხს უარყოფითად აფასებს და აღნიშნავს, რომ საზღვარგარეთ მყოფი საქართველოს უამრავი მოქალაქე სამშობლოში დაბრუნებას ვერ ახერხებს.
როგორც მან ჟურნალისტებს განუცხადა, სახელმწიფო საზღვრებს გარეთ დარჩენილ მოქალაქეებს ვერავითარ დახმარებას ვერ სთავაზობს.
„ეს კიდევ ერთხელ აჩვენებს იმას, რომ რეალურად, სიბნელეში აცეცებს ხელს დღევანდელი ხელისუფლება, რაც შეეხება პანდემიას და პანდემიასთნ დაკავშირებით ეკონომიკური პროცესების მართვას იმიტომ, რომ პირველ რიგში, ჩვენი უამრავი თანამოქალაქე არის დარჩენილი სხვადასხვა ქვეყანაში და ვერ ბრუნდება სამშობლოში. მათ არანაირ დახმარებას არ სთავაზობს სახელმწიფო. ბევრ ადამიანს იმედი ჰქონდა, რომ პირველ ივლისს ჩამოვიდოდა, მაგრამ ახლა ესეც შეუძლებელი გახდა. ამ დროს ჩვენი ხელისუფლების მხრიდან მათთვის არავითარი შეთავაზება არ არის", - განაცხადა სამადაშვილმა.