ახალგაზრდობის სააგენტოს ხელმძღვანელი რეზო ჩარკვიანი, საქართველოში გაეროს მუდმივ კოორდინატორს საბინე მახლს და UNFPA-ს ხელმძღვანელს, ლელა ბაქრაძეს შეხვდა
ახლაგაზრდობის სააგენტოს პროექტის „გაეროში საქართველოს ახალგაზრდობის წარმომადგენლის“ ფარგლებში, გაეროს სახლში, სააგენტოს ხელმძღვანელი რეზო ჩარკვიანი, გაეროში საქართველოს ახალგაზრდობის მოქმედ წარმომადგენელთან ესმა გუმბერიძესთან ერთად, საქართველოში გაეროს მუდმივ კოორდინატორს ქალბატონ საბინე მახლს და გაეროს მოსახლეობის ფონდის საქართველოს წარმომადგენლობის (UNFPA) ხელმძღვანელს, ქალბატონ ლელა ბაქრაძეს შეხვდა.
როგორც „ინტერპრესნიუსს“ ახალგაზრდობის სააგენტოდან აცნობეს, შეხვედრაზე სააგენტოს ხელმძღვანელმა, საქართველოს ახალგაზრდობის მოქმედი წარმომადგენლის მანდატის გაგრძელება დაანონსა.
„მანდატის გაგრძელება გაეროში საქართველოს ახალგაზრდობის მოქმედ წარმომადგენელს ხელს შეუწყობს სამოქმედო გეგმით გათვალისწინებული ის აქტივობები განახორციელოს, რაც პანდემიის პირობებში ონლაინ სივრცეში ხორციელდებოდა. ის ასევე მიმდინარე წლის მარტის ბოლოს დაგეგმილ ეკონომიკური და სოციალური საბჭოს (ECOSOC) ახალგაზრდულ ფორუმს დაესწროს, რომელიც პანდემიის გამო სექტემბრისთვის გადაიდო. სააგენტო მზადაა აღნიშნული პროექტის განხორციელების ახალ კონცეფციაზე მუშაობის დასაწყებად საქართველოში გაეროს ოფისებთან და თავად, „გაეროს ახალგაზრდულ ელჩთან ერთად“. ვინაიდან გამოცდილებამ აჩვენა, რომ ეს პროექტი, გადაწყვეტილებების მიღების პროცესში ახალგაზრდობის მონაწილეობის კარგი მაგალითია”, - ნათქვამია ინფორმაციაში.
