საქართველოს პრემიერ-მინისტრის გიორგი გახარიას განცხადებით, ლუგარის ლაბორატორია ქვეყნის ჯანდაცვის სისტემისთვის ძალიან მნიშვნელოვანია, ისევე როგორც მისი ფუქცია იმ გამარჯვებაში, რომელიც საქართველოს ვირუსის რისკების მართვის მიმართულებით აქვს. ასე გამეხმაურა მთავრობის მეთაური ლუგარის ლაბორატორიასთან დაკავშირებით უკანასკნელ დღეებში გავრცელებულ ინფორმაციას.
„ლუგარის ლაბორატორია არის უაღრესად მნიშვნელოვანი ქვეყნის ჯანდაცვის სისტემისთვის, განსაკუთრებით დღეს, როდესაც ჩვენ ყველანი ერთად ეპიდემიასა და პანდემიას ვებრძვით. მერწმუნეთ, რომ ის ფუნქცია, რომელსაც დღეს ლუგარის ლაბორატორია ასრულებს, არის უკიდურესად მნიშვნელოვანი იმ გამარჯვებასა და წარმატებში, რომელიც ჩვენ ყველას ერთად, ჩვენს მოქალაქეებთან ერთად გვაქვს ვირუსის რისკების მართვაში. არანაირი წინააღმდეგობა, მე როგორც ვიცი, არა გვაქვს, ჩვენს საერთაშორისო პარტნიორებთან ერთად, ყველასთვის ღიაა ლუგარის კარი, ერთობლივად გუნდურად ყველამ ერთად რომ ნახოს რა ხდება“, - განაცხადა გიორგი გახარიამ.
ცნობისთვის, ოკუპირებული სამხრეთ ოსეთის „სახელმწიფო უშიშროების კომიტეტმა“ გაავრცელა ინფორმაცია, რომლის თანახმადაც, 3 ივლისს ე.წ. საზღვრის დარღვევის ბრალდებით დაკავებული საქართველოს მოქალაქე ხვიჩა მღებრიშვილი დე ფაქტო რესპუბლიკის ტერიტორიაზე გადასვლის მიზეზად ღამურების მოძებნასა და შემდგომ ლუგარის ლაბორატორიისთვის 5000 აშშ დოლარად რეალიზაციას ასახელებს.