ხელყუმბარით შეიარაღებული მამაკაცი, რომელმაც უკრაინაში პოლიციელი მძევლად აიყვანა,ყველა ბრალდების მოხსნას და გათავისუფლებას ითხოვს.
ამის შესახებ ინფორმაციას უკრაინული მედია ადგილობრივ პოლიციაზე დაყრდნობით ავრცელებს.
„მას წასვლა სურს. ავტომობილის ქურდობისთვის აპატიმრებდნენ და ახლა მას მძეველი ჰყავს. ის მოითხოვს, რომ ყველა ბრალდება (ავტომობილის ქურდობა და მძევლის აყვანა) მოვუხსნათ და წასვლის ნება დავრთოთ,“- აცხადებენ ადგილობრივი პოლიციის დეპარტამენტში.
შეგახსენებთ, დღეს უკრაინის ქალაქ პოლტავაში ხელყუმბარით შეიარაღებულმა მამაკაცმა დაკავებისას პოლიციელი მძევლად აიყვანა. მოგვიანებით კი, სამართალდამცავებთან მოლაპარაკებების შედეგად, მძევლად აყვანილი პოლიციელი მთავარი დეტექტივით, პოლიციის პოლკოვნიკ ვიტალი შიიანით ჩაანაცვლა. უკრაინული მედიის ინფორმაციით, გამტაცებელმა ავტომობილი მოითხოვა, რომლითაც ის, მძევალთან ერთად, ქალაქ კიევისკენ მიემართება.