დიმიტრი ხუნდაძე ჯანმო-ს საქართველოს ოფისის ხელმძღვანელს და ორგანიზაციის ექსპერტებს შეხვდა

პარლამენტის ჯანმრთელობის დაცვისა და სოციალურ საკითხთა კომიტეტის თავმჯდომარე დიმიტრი ხუნდაძე „ჯანმრთელობის მსოფლიო ორგანიზაციის“ საქართველოს ოფისის ხელმძღვანელ სილვიუ დომენტისსა და ამავე ორგანიზაციის ექსპერტებს შეხვდა.

საქართველოს პარლამენტის პრესსამსახურის ინფორმაციით, შეხვედრაზე მხარეებმა ისაუბრეს ჯანმრთელობის კუთხით არსებულ ვითარებაზე, შეაფასეს ქვეყნის წინაშე მდგარი გამოწვევები და დასახეს სამომავლო თანამშრომლობის გეგმები.

„მსოფლიო ჯანდაცვის ორგანიზაცია ბოლო წლების განმავლობაში მნიშვნელოვან ტექნიკურ თუ პრაქტიკულ დახმარებას უწევს საქართველოს ხელისუფლებას ჯანდაცვით მიმართულებებში, რაც მოსახლეობის სასიცოცხლო ინტერესების დაცვას ემსახურება. ამავე ორგანიზაციის ტექნიკური დახმარებით, ქვეყანამ შეძლო თამბაქოს კონტროლის კანონმდებლობის რეფორმის სანიმუშოდ განხორციელება და, ბუნებრივია, შეხვედრაზე საუბარი ამ საკითხსაც შეეხო. როგორც ამ კუთხით ვითარების შეფასებისას ითქვა, ჯანმო პერიოდულად ატარებს კვლევებს და უახლესი მონაცემების მიხედვით, საქართველოში შემცირებულია თამბაქოს მოხმარება, განსაკუთრებით მცირეწლოვნებში, რაც ჯანმოს წარმომადგენლის შეფასებით არის ძალიან პოზიტიური შედეგი.

ჯანმო-სთან მჭიდრო კომუნიკაციით დღეს საქართველოში ფარმაცევტული სფეროს საკანონმდებლო რეფორმა მზადდება და შეხვედრაზე მხარეებმა ყურადღება ამ საკითხსაც დაუთმეს. მისი დაგეგმა ერთობლივად მოხდა სულ რამდენიმე თვის წინ, ვინაიდან, აქამდე არსებული კანონმდებლობა არის მოძველებული, 2009 წლის შემდეგ ის არ განახლებულა. წამლისა და ფარმაცევტული საქმიანობის შესახებ კანონპროექტი კომიტეტმა, ჯანდაცვის მსოფლიო ორგანიზაციის ექსპერტებთან ერთად, ადგილობრივი ძალებით მოამზადა და ინიცირებისათვის ფაქტობრივად მზადაა.

როგორც დიმიტრი ხუნდაძემ აღნიშნა, კომიტეტის მიზანია, რომ კანონპროექტის ინიცირება ამ მოწვევის პარლამენტში მოახდინონ - ეს არის პროგრამის მინიმუმი და შესაძლოა ის პირველი მოსმენითაც იყოს განხილული. როგორც შეხვედრაზე სტუმრის მხრიდან აღინიშნა, ჯანდაცვის მსოფლიო ორგანიზაციის მიერ ეს ნამუშევარი შეფასებულია მაღალ დონეზე.

„ტრადიციად ჩამოყალიბდა ჯანმრთელობის დაცვისა და სოციალურ საკითხთა კომიტეტის თანამშრომლობა ჯანდაცვის მსოფლიო ორგანიზაციასთან და უშუალოდ საქართველოს ოფისის დირექტორთან. ჩვენ გარკვეული პერიოდულობით ვხვდებით ერთმანეთს, ვაფასებთ ვითარებას ამა თუ იმ მიმართულებით და შემდეგ კონკრეტულ ქმედებებს ვგეგმავთ. ასე იყო კოვიდ-19-თან მიმართებაში, სადაც პირველ ეტაპზე, ვიდრე ჯერ კიდევ პანდემია იქნებოდა გამოცხადებული, ჩვენ ერთად დავგეგმეთ შემდგომი ნაბიჯები და დღეს ხედავთ, რომ არის გამორჩეულად პოზიტიური შედეგი, რაც საქართველომ კოვიდ-19-თან ბრძოლის გზაზე მიაღწია, ამას აღიარებს ჯანდაცვის მსოფლიო ორგანიზაციაც და მისი საქართველოს წარმომადგენელიც, მაგრამ რა თქმა უნდა შესაძლო მეორე ტალღისთვის მზადებაც აუცილებელია და სხვა ქვეყნებთან ერთად, საქართველოც ამ გზას გაივლის და ის მოემზადება შესაძლო მეორე ტალღისთვის. დღეს ჩვენ შევაფასეთ არსებული ვითარება საქართველოში, ზოგადად, მსოფლიოში და დავგეგმეთ კონკრეტული ნაბიჯები. ჯანდაცვის მსოფლიო ორგანიზაციამ მოგვცა დაპირება, რომ ისინი დაეხმარებიან საქართველოს, იქნება ტვირთებიც, როგორც პირველადი ინდივიდუალური დაცვის საშუალებები, ასევე სამედიცინო აღჭურვილობა, ეს არის ძალიან მნიშვნელოვანი და ამისათვის კიდევ ერთხელ მსურს მათ მადლობა გადავუხადო“, - განაცხადა დიმიტრი ხუნდაძემ შეხვედრის შემდეგ.

როგორც პარლამენტის ჯანმრთელობისა დაცვისა და სოციალურ საკითხთა კომიტეტის თავმჯდომარემ განაცხადა, ჯანმრთელობის მსოფლიო ორგანიზაციასთან თანამშრომლობა ბუნებრივია გაგრძელდება, ვინაიდან, „ეს თანამშრომლობა ჩვენი ქვეყნისათვის ნამდვილად არის ეფექტური“.​

სტეპან გრიგორიანი - რუსეთი ჩქარობს სამხრეთ კავკასიაში დასავლეთთან შედარებით უპირატესობის მიღწევას
მინდია დავითაძე - საამაყოა, როცა WIPO-ს გენერალური დირექტორის მხრიდან დადებითად ფასდება საქპატენტის საქმიანობა
ქართული პრესის მიმოხილვა 05.03.2021
ზურაბ ბატიაშვილი - ხელისუფლებას აქვს მარტივი არჩევანი - ან დასავლეთთან ერთად ან დასავლეთის წინააღმდეგ, ამ არჩევანში თუ დასავლეთის და საკუთარი ხალხის წინააღმდეგ წავლენ, ხელისუფლებას მალევე დაკარგავენ
იურიდიული პირები პროკრედიტ ბანკში ანგარიშებს დისტანციურად გახსნიან
საერთაშორისო სისტემა ინტელიექსპრესი საქართველოს მოქალაქეებისთვის ევროპულ სერვისებზე წვდომას ამარტივებს