ლიბანში მიმდინარე ანტისამთავრობო საპროტესტო აქციის დასაშლელად სამართალდამცავებმა ცრემლსადენი გაზი გამოიყენეს, - ამის შესახებ ინფორმაციას BBC-ი ავრცელებს.
„წითელი ჯვრის“ ცნობით, შეტაკებების დროს ერთი პოლიციელი დაიღუპა, 170-ზე მეტი ადამიანი კი - დაშავდა.
აქციის მონაწილეებმა, რომლებიც „პარლამენტის მოედანსა“ და „მარტირსის მოედანზე“ შეიკრიბნენ და მთავრობის გადადგომას და რეფორმებს ითხოვდნენ, სამართალდამცავებს ქვები დაუშინეს და პარლამენტისკენ მიმავალ გზაზე პოლიციის კორდონის გარღვევა სცადეს.
აღსანიშავია, რომ საპროტესტო აქციების ფონზე ლიბანში ორმა მინისტრმა - ინფორმაციისა და გარემოს დაცვის მინისტრებმა- თანამდებობები დატოვეს. მათი თქმით, ხელისუფლებამ ქვეყანაში რეფორმების განხორციელება ვერ შეძლო.
შეგახსენებთ, ლიბანში ანტისამთავრობო საპროტესტო აქციები დედაქალაქ ბეირუთში გასული კვირის სამშაბათს მომხდარ ძლიერ აფეთქებას მოჰყვა, რომლის დროსაც დაიღუპა 158 და დაშავდა 6000-ზე მეტი ადამიანი.