„სტრატეგია აღმაშენებლის" ლიდერმა გიორგი ვაშაძემ ტურიზმის სფეროში არსებულ პრობლემებზე ისაუბრა. ვაშაძემ ქუთაისში ტურიზმის სექტორში დასაქმებულებთან ერთად გამართულ ბრიფინგზე განაცხადა, რომ კრიზისის შედეგად ქვეყანაში უამრავი სასტუმრო დაიხურა და ათასობით ადამიანი უმუშევარი დარჩა.

მისი თქმით, კორონაკრიზისი მხოლოდ „ქართულ ოცნებასთან" დაახლოებული პარტნიორებისთვის აღმოჩნდა კარგი ბიზნესი და 21 კომპანიისთვის 45 მილიონი ლარის ღირებულების ტენდერი გამოცხადდა.

ვაშაძის თქმით, საგანგებო მდგომარეობის დროს 23, 6 მილიონი ლარი დაიხარჯა გამარტივებული შესყიდვით სასტუმროს მომსახურების შესაძენად და სასტუმროების მფლობელთა უმეტესობა „ქართული ოცნების" შემომწირველები არიან.

როგორც ვაშაძემ აღნიშნა, „დამსხვრეული ოცნებების პარტიამ“ არაფერი გააკეთა ტურიზმის სფეროში დასაქმებული ადამიანების დასახმარებლად. ვაშაძის თქმით, მისი ხელისუფლებაში მოსვლის შემთხვევაში, ამ ფაქტების გამოძიება მოხდება.