„ევროპული საქართველოს“ საარჩევნო შტაბის ხელმძღავნელის, სერგი კაპანაძის განცხადებით, ოპოზიციური პარტიები მნიშვნელოვან საკითხებზე შეთანხმდნენ.

კაპანძის თქმით, შეთანხმება მოიცავს ნაფიცი მსაჯულების შემოღებას, მათ შორის მძიმე საქმეებზე, ასევე უცხოელი მოსამართლეების ჩამოყვანას უმაღლეს ინსტანციაში და ადგილობრივ დონეზე, თვითმართველობებში. ასევე, პოლიციის უფროსებისა და მოსამართლეების არჩევითობას, რაც კაპანაძის თქმით, გაზრდის მათ ანგარიშვალდებულებას ხალხის მიმართ.

როგორც მან აღნიშნა, „ევროპული საქართველოს“ ხედვა იქნება კომპასი იმისა, თუ როგორ უნდა წავიდეს წინ რეფორმები სხვადასხვა სფეროში.

„პროდასავლური ევროპული პარტიები რამდენიმე თვეა „ლეიბორისტული პარტიის“ ოფისში უკვე არამხოლოდ პოლიტიკურ და ტაქტიკურ საკითხებზე ვმსჯელობთ და ვთანხმდებით, არამედ შინაარსობრივ საკითხებზეც, ამიტომ ეს შეთანხმება იყო ძალიან მნიშვნელოვანი. ჩვენ გავაკეთეთ მონახაზი იმ სასამართლო რეფორმის, რომელიც აუცილებლად უნდა განხორციელდეს. ეს გულისხმობს ნაფიცი მსაჯულების შემოღებას და მათ გავრცელებას ყველა მძიმე საქმეზე, რაც მნიშვნელოვანია, რადგან ამ შემთხვევაში მოსამართლეზე გავლენის მოხდენის შანსი მცირდება ხელისუფლების მხრიდან და დღეს ეს არის ძალიან დიდი პრობლემა. მოსყიდული და კლანის მოსამართლეების შანსი პრაქტიკულად დადის ნულამდე. ასევე, პოლიციის უფროსების და მოსამართლეების არჩევითობა რეგიონებში, ზრდის მათ ანგარიშვალდებულებას ხალხთან. „ევროპულ საქართველოს“ მიაჩნია, რომ ძალიან მნიშვნელოვანია უმაღლესი ინსტანციის სასამართლოებში უცხოელი, კერძოდ ამერიკელი მოსამართლეების მოწვევა, რათა საერთოდ გაქრეს შანსი რაიმე ზემოქმედების მოსამართლეზე. ეს არის ძირითადი მონახაზი იმ რეფორმის, რომელზეც ჩვენ შევჯერდით და ძალიან კარგია, რომ ეს იდეები არის გაზიარებული უმრავლესობის მიერ თუ არა, ყველა პროდასავლური ოპოზიცირი პარტიის მხრიდან. ეს ნიშნავს იმას, რომ „ქართული ოცნების“ დამარცხების შემდეგ, ის არასწორი მიმართულება, რომელიც დღეს არის ქვეყანაში მარლთმსაჯულების მხრივ, შემოტრიალდება და შეიცვლება. ჩვენი ეს ხედვა იქნება კომპასი იმისა, თუ როგორ უნდა წავიდეს წინ მარლთმსაჯულების სფეროში რეფორმები,“ - განაცხადა სერგი კაპანაძემ.