გიორგი შაქარაშვილის საქმეზე ბრალდებული არასრულწლოვნის, ნ.ქ.-ს ადვოკატის, დალი იმნაიშვილის განცხადებით, სასამართლოში პროცესების ექვსი და შვიდსაათიანი მიმდინარეობა ბრალდებული არასრულწლოვნებისთვის დამთრგუნველია.

მისივე თქმით, დღევანდელ პროცესზე მოსამართლეს მიმართავენ თხოვნით, რომ კვირაში 2-ზე მეტი პროცესი არ დაინიშნოს.

„პროცესების ინტენსიური მიმდინარეობა როგორც დაცვის მხარისთვის, ასევე ბრალდებულებისთვისაც ძნელია, რადგან არასრულწლოვნები არიან და დღეში 6-7 საათიანი მუშაობა მათთვის არის დამთრგუნველი. ასევე 3-4 საათის განმავლობაში იკითხებიან არასრულწლოვანი მოწმეები, რაც ასევე ძნელია. ჩვენ ვთხოვთ მოსამართლეს, კვირაში 2 დღის მეტი არ დანიშნოს პროცესი. ბრალდებულებთან შეხვედრები გვინდა, მათთან განვლილ მოწმეებთან დაკითხვის შეჯერება. ასევე ადვოკატებს სხვა პროცესებიც გვაქვს, რაც ჩვენთვისაც დისკომფორტია”,- განაცხადა იმნაიშვილმა.