23 წლის გარდაცვლილი პროგრამისტის თამარ ბაჩალიაშვილის საქმის პროკურორის დავით გუმბერიძის განცხადებით, თამარ ბაჩალიაშვილის დედასთან თეონა თამაზაშვილთან უწყებას კითხვები ექნება მის მიერ გაკეთებულ განცხადებებთან დაკავშირებით.

დავით გუმბერიძის განცხადებით, თეონა თამაზაშვილი მოწმის სახით დაიკითხება.

"დღევანდელი დაკითხვა შეეხება თეონა თამაზაშვილის მიერ 30 აგვისტოს გაკეთებულ განცხადებას. ხსენებული დღის შემდეგ ჩვენ გვაქვს აქტიური კომუნიკაცია მის დამცველ ადვოკატთან დაკითხვასთან დაკავშირებით. ქალბატონი, თეონა გუშინ გამოცხადდა საგამოძიებო ორგანოში, უარი განაცხადა პროკურატურაში ჩვენების მიცემაზე. ჩვენ სასამართლოს მივმართეთ და დღეს ჩატარდება მისი მოწმის სახით დაკითხვა", - განაცხადა საქმის პროკურორმა.

პროკურორის თქმით, აქტიურად მიმდინარეობს კომუნიკაცია, როგორც თამარ ბაჩალიაშვილის ოჯახთან ასევე, მის ადვოკატთან.

"გამოძიება ყველა მიმართულებით მუშაობს. თუ რაიმე ინფორმაცია გაჟღერდება თამარ ბაჩალიაშვილის საქმესთან მიმართებაში, ჩვენ ყველა ამ ინფორმაციას ვამოწმებთ. აქტიური კომუნიკაცია გვაქვს ყველა მხარესთან, თუ რაიმე ინფორმაცია არსებობს, ყველა ამ გარემოებას ვსწავლობთ, ერთ-ერთია 30 აგვისტოს გაკეთებული განცხადება" , - განაცხადა პროკურორმა.

ამასთან, დღეს, გამოძიებას თეონა თამაზაშვილთან კითხვები ექნება იმ განცხადებაზეც, სადაც ის ამბობს, რომ თამარ ბაჩალიაშვილმა გაშიფრა სქემა, თუ როგორ მარაგდებოდა ყარაბაღის ომი იარაღით.

ცნობისთვის, გარდაცვლილი 23 წლის პროგრამისტის, თამარ ბაჩალიაშვილის დედა, თეონა თამაზაშვილი , დღეს მაგისტრატი მოსამართლის თანდასწრებით დაიკითხება.