ბათუმში, ,,ახალგაზრდობის სააგენტოს“ მილიონიანი ფონდის საგრანტო კონკურსში გამარჯვებული პროექტის ,,ქალები დღეს“ ფარგლებში თავისუფალი სამუშაო სივრცე გაიხსნა, - ამის შესახებ „ინტერპრესნიუსს“ ახალგაზრდობის სააგენტოდან აცნობეს.
მათივე ცნობით, პროექტი „ქალები დღეს“ ორ მიმართულებას მოიცავს, 6 თვიან ტრენინგ კურსს აჭარის რეგიონში მცხოვრები 16-29 წლამდე 60 გოგონასთვის, რომელიც მათ პიროვნული და ეკონომიკური გაძლიერებაში დაეხმარება და პროფესიული უნარ-ჩვევებს აუმაღლებს და თავისუფალ ღია სივრცეს, რომელიც კვირის სამუშაო დღეებში სრულიად უფასოდ იქნება ხელმისაწვდომი აჭარის რეგიონში მცხოვრები ნებისმიერი ახალგაზრდისთვის, ტრენინგების, კონფერენციების, სამუშაო შეხვედრებისა და ინდივიდუალური მუშაობისთვის.
პროექტის დასრულების შემდეგ ბენეფიცირების დასაქმებას აჭარის დასაქმების სააგენტო შეუწყობს ხელს.
შეგახსენებთ, რომ ახალგაზრდობის სააგენტო მილიონიანი ფონდის საგრანტო კონკურსის ფარგლებში მიზნად ისახავს ახალგაზრდული ორგანიზაციების, როგორც ახალგაზრდული სფეროს მთავარი მდგენელის გაძლიერებას, რომლებიც არაფორმალური განათლების გზით უზრუნველყოფენ რეგიონში მცხოვრები ახალგაზრდებისთვის კომპეტენციების ზრდას, მხარდაჭერას გაუწევენ ახალგაზრდულ ინიციატივებს და უზრუნველყოფენ მათ ჩართულობას ადგილობრივ და საზოგადოებრივ ეკონომიკურ თუ კულტურულ ცხოვრებაში.