გარდაცვლილი 23 წლის პროგრამისტის, თამარ ბაჩალიაშვილის ოჯახის ადვოკატის, მიხეილ რამიშვილის განცხადებით, ის ხვალიდან იმ მოწმეების ჩვენებებს გაასაჯაროებს, რომელთა გავრცელებაც „პროკურატურას არ აწყობს“.

როგორც „ინტერპრესნიუსთან“ საუბარში რამიშვილი აღნიშნავს, მოწმეების ჩვენებიდან ირკვევა, რომ გამოძიება ობიექტურად წარმართული არ არის.

„მოწმეების ჩვენებებს გამოვამზეურებთ და გამოჩნდება, რომ ეს მოწმეები გულახდილები არ არიან. გარკვეულწილად გამოჩნდება, რომ ზეწოლის ქვეშ არიან და გამოძიების დაკვეთებს ასრულებენ. პროკურატურის ინტერესშია, რომ ეს ჩვენებები არ გაასაჯაროვონ“, - აცხადებს რამიშვილი.

ცნობისთვის, თამარ ბაჩალიაშვილი 18 ივლისს გაუჩინარდა. ის 5-დღიანი ძებნის შემდეგ თეთრიწყაროს ტყესთან, საკუთარ მანქანაში გარდაცვლილი იპოვეს. ბაჩალიაშვილის საქმეზე გამოძიება თავისუფლების უკანონო აღკვეთის მუხლით დაიწყო, შემდეგ კი ბრალდების კვალიფიკაციას თვითმკვლელობამდე მიყვანის მუხლი დაემატა.

გუშინ, გენერალურმა პროკურატურამ საბოლოო ქიმიურ-ტოქსიკოლოგიური ექსპერტიზის დასკვნა გაასაჯაროვა, რომლის თანახმად, გარდაცვლილი თამარ ბაჩალიაშვილის სხეულიდან აღებულ ბიოლოგიურ ობიექტებში: კუჭი, ღვიძლი, ნაღვლის ბუშტი, ნაწლავი, თირკმელი, კუნთი - აღმოჩნდა წნევის, ტკივილგამაყუჩებელი და საძილე პრეპარატების შემცველი ნივთიერებები, ამავე დასკვნით, გარდაცვლილის ორგანიზმში აღმოჩენილი მედიკამენტების ოდენობა ასეულებით აღემატება დადგენილ მინიმალურ ლეტალურ ოდენობას. ამავდროულად, აღნიშნული მედიკამენტები ერთდროულად მიღებისას აძლიერებენ ერთმანეთის მოქმედებას ორგანიზმზე.