ცხადია, მიხეილ სააკაშვილი უნდა დაბრუნდეს, ჩამობრძანდეს და შევიდეს იქ, სადაც ყველაზე მეტად ელოდებიან - ეს არის სასჯელაღსრულების სამსახური, - ამის შესახებ ფრაქცია „ქართული ოცნების" თავმჯდომარე რატი იონათამიშვილმა მიხეილ სააკაშვილის პრემიერ- მინისტრობის კანდიდატად დასახელების კომენტირებისას განუცხადა.

მისივე თქმით, სააკაშვილის კანდიდატურის დასახელებით მისი მხარდამჭერი პარტიები აღიარებენ, რომ ამ დანაშაულში მისი თანამზრახველები არიან.

„სააკაშვილმა იმდენჯერ თქვა და იმდენჯერ არ შეასრულა საკუთარი ნათქვამი, რომ მისი განცხადებები ძალიან უხერხულია და კომედიის ჟანრშია გადასული. ფაქტობრივად, ათი დღის წინ, ამ ადამიანმა უმძიმესი დანაშაულები აღიარა. ამის შემდეგ, ოპოზიცია ასახელებს მას პრემიერობის კანდიდატად, რაზე უნდა ვილაპარაკოთ? - ქართული მართლმსაჯულება ელოდება იმ უმძიმესი დანაშაულების გამო, რაც ოჯახების წინაშე აქვს ჩადენილი.

არც ამ ადამიანს და არ მის მხარდამჭერ პარტიებს იმის რესურსი არ აქვთ, რომ ქართულ პოლიტიკურ გარემოზე რაიმე გავლენა მოახდინონ. ეს ადამიანები არიან ქართული პოლიტიკის წარსულები, მათ უმძიმესი დანაშაული აქვთ ჩადენილი“, - განაცხადა იონათამიშვილმა.

ცნობისათვის, "ნაციონალურმა მოძრაობამ" მიხეილ სააკაშვილის პრემიერობის კანდიდატად დაასახელა.