ანრი ოხანაშვილი - ქვეყნის მტრები, კიდევ ერთხელ დაირაზმნენ მსჯავრდებულ სააკაშვილის გარშემო, კიდევ ერთხელ მოხდა ამ ჯგუფების სრული ლუსტრაცია

იურიდიულ საკითხთა კომიტეტის თავმჯდომარის, ანრი ოხანაშვილის განცხადებით, „ნაციონალური მოძრაობისა” და გაერთიანებული ოპოზიციის მიერ პრემიერ-მინისტრობის კანდიდატად მიხეილ სააკაშვილის წარდგენით ამ პარტიების „დანაშაულებრივი მიდგომა გაშიშვლდა”.

როგორც ოხანაშვილი აცხადებს, სააკაშვილის ჩამოსვლის შემთხვევაში სცენარი ისეთივე იქნება, „როგორც ყველა სხვა კრიმინალური მენტალიტეტის და მის მიერ ჩადენილი დანაშაულის შემთხვევაში”.

„ამ გადაწყვეტილებით და საერთო ხედვის გაჟღერებით ე.წ. გაერთიანებული ოპოზიციის, რომლებიც, რა თქმა უნდა, მთლიანობაში არის „ნაციონალური მოძრაობა”, გაშიშვლდა კიდევ ერთხელ მათი დანაშულებრივი მიდგომა და ზოგადად, მოხდა ლუსტრაცია ამ დანაშაულებრივი წარმონაქმნის. ვინაიდან, ძალიან კარგად ვიცით და ყველამ კარგად ვიხილეთ, რამდენიმე დღის წინ მათი ბელადის, მსჯავრდებულ სააკაშვილის აღიარება პირდაპირ ეთერში. მას შემდგომ, რაც „ნაციონალურ მოძრაობასთან” აფილირებული ჯგუფები, რომლებიც მთლიანობაში არიან „ერთიანი ნაციონალურ მოძრაობა” - ქვეყნის მტრები, კიდევ ერთხელ დაირაზმნენ მსჯავრდებულ სააკაშვილის გარშემო, კიდევ ერთხელ მოხდა ამ ჯგუფების სრული ლუსტრაცია, ვინაიდან ისინი ემხრობიან დანაშაულებრივ კრიმინალურ გაერთიანებას, მათ ბელადს, რომელიც გასამართლებულია ადამიანის უფლებათა ევროპული სასამართლოს მიერ და მხილებულია უმძიმეს დანაშაულებში”,- განაცხადა ოხანაშვილმა.

ამასთან, როგორც ის აღნიშნავს, „ნაციონალური მოძრაობა" და „ევროპული საქართველო" ერთი მედლის ორი მხარეა.

„მედლის ერთი მხარე არის სააკაშვილი, რომელიც გამოვიდა პირდაპირ ეთერში და აღიარა დანაშაულებები, რაც მან და მისმა ხელისუფლებამ ჩაიდინა და ამ ადამიანის გარშემო ე.წ. ოპოზიცია გაერთიანდა. მეორე ჯგუფი არის ბოკერიას ხელმძღვანელობით, ამას არ აღიარებს და საზოგადოების მანიპულირებას და შეცდომაში შეყვანას ცდილობს. შესაბამისად, ეს არის ერთი მედლის ორი მხარე", - განაცხადა ოხანაშვილმა.

ცნობისთვის, „ერთიანი ნაციონალური მოძრაობა“ და გაერთიანებაში „ძალა ერთობაშია“ შემავალი პარტიები პრემიერ-მინისტრობის კანდიდატად საქართველოს ყოფილ პრეზიდენტს, მიხეილ სააკაშვილს წარადგენს.