ბექა ნაცვლიშვილი - მიხეილ სააკაშვილი თავისი დაპირებებით „ქართულ ოცნებას" ეხმარება

ფრაქცია „დამოუკიდებელი დეპუტატების" წევრი ბექა ნაცვლიშვილი მიიჩნევს, რომ „ქართული ოცნება" სწორედ მიხეილ სააკაშვილის „გამოხტომებით" ცდილობს ქართული საზოგადოების კონსოლიდირებას მის ირგვლივ. როგორც ბექა ნაცვლიშვილმა მიხეილ სააკაშვილის განცხადებების კომენტირებისას აღნიშნა, სააკაშვილი ვერასდროს გახდება საქართველის პრემიერ - მინისტრი.

„მიხეილ სააკაშვილი თავისი დაპირებებით, ჩასვლა-ჩამოსვლით ერთადერთი ეხმარება „ქართულ ოცნებას", გამომდინარე იქიდან, რომ „ქართული ოცნება“ სწორედ მიხეილ სააკაშვილის გამოხტომებით ცდილობს ქართული საზოგადოების კონსოლიდირებას მის ირგვლივ, როგორც „ნაციონალური მოძრაობის“ წინააღმდეგ თითქოს ერთადერთ მებრძოლ ძალად. აქედან გამომდინარე, მიხეილ სააკაშვილის კომიკური განცხადებები ვერანაირ გავლენას ვერ იქონიებს უკვე საარჩევნო გარემოზე, გამომდინარე იქიდან, რომ მიხეილ სააკაშვილი არის ამ ქვეყნის წარსული. ის ვერც ორი, ვერც ოთხი და ვერც ექვსი წლით ვერ გახდება საქართველოს პრემიერი, რადგან ამას ქართველი ხალხი უკვე აღარ დაუშვებს“, - განაცხადა ნაცვლიშვილმა.

შეგახსენებთ, რომ მიხეილ სააკაშვილის განცხადებით, ის საქართველოს პრემიერ- მინისტრის პოსტის დაკავებას 2 წლით აპირებს. „ეს დრო საკმარისი იქნება იმისთვის, რომ ქვეყანა ჭაობიდან ამოვათრიოთ,"- აღნიშნა მან.