პარტია “ალეკო ელისაშვილი - მოქალაქეების” ლიდერმა ლევან იოსელიანმა დღევანდელ ბრიფინგზე ხელისუფლებას ინიციატივით მიმართა, სასწავლო პროცესის ეფექტიანი აღდგენის ასევე, მოსწავლეთა ჯანმრთელობის უსაფრთხოების მიზნით, მოხდეს ჯგუფების ორ ნაწილად გაყოფა და სასწავლო პროცესის ორ ცვლაში დაწყება.
მისი თქმით, საჭიროების შემთხვევაში, გამოყენებული უნდა იყოს შაბათი და კვირა.
„ერთჯერადად გაცემული, დახმარებების ნაცვლად კი, რაც არის ამომრჩევლის მოსყიდვა და არაფერი სხვა, მოხდეს პედაგოგთა ზეგანაკვეთური შრომის ანაზღაურება. ეს არის ერთადერთი სწორი გზა ამ ვითარებაში, მე და ალეკო დღის განმავლობაში ასობით ზარს ვპასუხობთ და მათი დიდი ნაწილი სწორედ აღნიშნულ პრობლემას ეხება. საჯარო სკოლებში ონლაინ სწავლება სამარცხვინოდ მიმდინარეობს, მხოლოდ 2 ან 3 გაკვეთილი ტარდება დღის მანძილზე და აქედან ერთი სპორტია თეორიულად და მეორე მუსიკა თეორიულად, ეს ხომ ძალიან არასერიოზული მიდგომაა სახელმწიფოს მხრიდან მოსწავლეთა განათლებისა და ცოდნის გაზიარების მიმართ. ამიტომ ეფექტური გადაწყვეტილებებია საჭირო და მოვუწოდებთ შესაბამის სტრუქტურებს, რომ დაუყოვნებლივ გადადგან ადეკვატური ნაბიჯები", - განაცხადა ლევან იოსელიანმა.