კახა კალაძის განცხადებით, ადამიანები, რომლებსაც „საპატიო თბილისელის“ წოდება მიენიჭათ, მოქალაქეების ჯანმრთელობისა და სიცოცხლის უსაფრთხოების სადარაჯოზე არიან
დედაქალაქის მერის კახა კალაძის განცხადებით, ადამიანები, რომლებსაც „საპატიო თბილისელის“ წოდება მიენიჭათ, მთელი წლის განმავლობაში ადამიანების ჯანმრთელობისა და სიცოცხლის უსაფრთხოების სადარაჯოზე არიან. კალაძის განმარტებით, თბილისობის განსხვავებულ პირობებში აღნიშვნა, ქვეყანაში არსებულ ეპიდემიოლოგიურ ვითარებას უკავშირდება.
„დღეს ცოტა განსხვავებულად მოგვიწია თბილისობის აღნიშვნა არსებული ეპიდემიოლოგიური მდგომარეობიდან გამომდინარე, თუმცა მოვახერხეთ, რომ დაგვესახელებინა „საპატიო მოქალაქეები“. საპატიო მოქალაქის წოდებები ადამიანებს ვისაც გადავეცი, მართლაც მთელი ამ ბოლო ერთი წლის განმავლობაში ქვეყნის სადარაჯოზე დგანან და იცავენ ჩვენი ჯანმრთელობისა და სიცოცხლის უსაფრთხოებას. კიდევ ერთხელ მინდა, მივულოცო თითოეულ მათგანს,“- განაცხადა კალაძემ.
ცნობისთვის, 2020 წლის საპატიო თბილისელის წოდება ქართველ კლასიკოსს, მწერალ გურამ დოჩანაშვილსა და პანდემიასთან მებრძოლ ცხრა ექიმს მიენიჭა.
