ფეხბურთელ გიორგი შაქარაშვილის საქმეზე ბრალდებული 6 არასრულწლოვნის საქმეზე პროკურატურა მტკიცებულებების გამოკვლევას სავარაუდოდ, დღეს დაასრულებს.
დღევანდელ სასამართლო პროცესზე, რომელიც მცხეთის რაიონულ სასამართლოში მიმდინარეობს, ნივთიერ მტკიცებულებებს გამოიკვლევენ.
როგორც საქმის პროკურორი ნანა გუგუტიშვილი განმარტავს, აღნიშნული მტკიცებულებები ბრალდების დამადასტურებელ მტკიცებულებას წარმოადგენს, ვინაიდან, მათზე საქმისათვის მნიშვნელოვანი კვლები იქნა აღმოჩენილი.
პროკურორის თქმით, საქმეზე არაერთი მტკიცებულება არსებობს, რომელიც ბრალდებულების მიმართ წარდგენილ ბრალს ადასტურებს. შესაბამისად, გუგუტიშვილს სასამართლოს მიერ გამამატყუნებელი განაჩენის გამოტანის მოლოდინი აქვს.
ბრალდების მხარის მტკიცებულებების გამოკვლევის შემდეგ, საკუთარ მტკიცებულებებს დაცვის მხარე გამოიკვლევს. გამორიცხული არ არის, ბრალდებული არასრულწლოვნების ნაწილმა დღევანდელ სასამართლო პროცესზე ჩვენება მისცენ.
ცნობისთვის, ფეხბურთელ გიორგი შაქარაშვილის საქმეზე ბრალდებულ არასრულწლოვნებს ძალადობას, ძალადობის ორგანიზებას, მასში მონაწილეობასა და თავისუფლების უკანონო აღკვეთას ედავებიან.