სტრატეგიული ობიექტები არის რეგიონის უსაფრთხოების გარანტორი, აქედან გამომდინარე, ყველა არის დაინტერესებული, რომ არანაირი საფრთხე მათ ნორმალურ ფუნქციონირებას არ შეექმნას, - ასე ეხმაურება საქართველოს საგარეო საქმეთა მინისტრი დავით ზალკალიანი აზერბაიჯანის გენერალური პროკურატურის განცხადებას, რომლის მიხედვით, სომხეთმა ბაქო-თბილისი-ჯეიჰანის ნავთობსადენის დაბომბვა სცადა.
ზალკალიანის თქმით, ძალიან მნიშვნელოვანია, რომ მსგავს ობიექტებზე რაიმე სახის სამხედრო ზემოქმედება არ მოხდეს.
„ჩვენ ვიხილეთ ორივე მხარის გამოხმაურება და ძალიან მნიშნველოვანია, რომ არ მოხდეს ამ ობიექტებზე რაიმე სახის სამხედრო ზემოქმედება, რადგანაც ეს არის უაღრესად მნიშვნელოვანი სტრატეგიული ობიექტი მთლიანად რეგიონისთვის და რეგიონს მიღმა, ყველა ჩვენი საერთაშორისო პარტნიორისთვის, რომელიც უზრუნველყოფს მათ ენერგოუსაფრთხოებასაც.
ის სტრატეგიული, მნიშნველოვანი პროექტები, რომლებიც გადის სამხრეთ კავკასიაში, ჩვენი ინტერესის სფეროა და მუდმივად ხდება მონიტორინგი ამ მიმართულებით. ჩვენ ვსაუბრობთ როგორც ჩვენს პარტნიორ ქვეყნებთან რეგიონში, უშუალოდ იმ ქვეყნებთან ვის ტერიტორიაზეც ეს სტრატეგიული ობიექტები გადის, ასევე ჩვენს სტრატეგიულ პარტნიორ აშშ-სთან და ევროკავშირთან“, - აღნიშნა დავით ზალკალიანმა.