გლდანის რაიონის გამგეობა ინფრასტრუქტურულ სამუშაოებს განაგრძობს. ამჯერად, გზის მოწესრიგების სამუშაოები კაჭარავას მეხუთე ჩიხში მიმდინარეობს. ამის შესახებ ინფორმაციას მერია ავრცელებს.

უწყების ცნობით, საგზაო სამუშაოების ფარგლებში, დაახლოებით, 1 200 კვადრატულ მეტრ ფართობზე ასფალტის საფარი იგება.

მათი ინფორმაციით, სამუშაოებისთვის, რომელსაც გლდანის რაიონის გამგეობის დაკვეთით, ტენდერში გამარჯვებული კომპანია ახორციელებს, 36 000 ლარამდე დაიხარჯება.

მიმდინარე სამუშაოებს გლდანის რაიონის გამგებელი ბექა მიქაუტაძე საკრებულოს მაჟორიტარ დეპუტატ შალვა ოგბაიძესთან ერთად გაეცნო.