ახალგაზრდობის სააგენტო, სამწლიანი რეფორმის ერთ–ერთი მიმართულების, მილიონიანი ფონდის საგრანტო კონკურსის ფარგლებში გამარჯვებული ორგანიზაციების მხარდასაჭერად რეგიონულ ტურნეს აგრძელებს. ამის შესახებ ინფორმაციას ახალგაზრდობის სააგენტო ავრცელებს.
მათივე ინფორმაციით, დღეს, სააგენტო მარნეულის მუნიციპალიტეტს ეწვია და საგრანტო კონკურსის ფარგლებში დაფინანსებული პროექტის „დასაწყისი“ ფარგლებში, ალგეთის ახალგაზრდული ცენტრი გახსნას დაესწრო.
ხსენებული პროექტის მიზანია ალგეთის ადმინისტრაციულ ერთეულში მცხოვრები 18-29 წლამდე ახალგაზრდების კომპეტენციების განვითარებაზე მიმართული მდგრადი პლატფორმის შექმნა და ადგილზე ახალგაზრდების გადაწყვეტილების მიღების პროცესში მონაწილეობის ხელშეწყობა. პროექტის ფარგლებში კომპეტენციების გასავითარებლად არაფორმლაური განათლების მიღების გზით, 20 ახალგაზრდა გადამზადდება, რომლებიც შედეგების გავრცობის მიზნით საკუთარ ცოდნასა და გამოცდილებას მუნიციპალიტეტის სკოლის მოსწავლეებს გაუზიარებენ.
,,შეგახსენებთ, რომ ახალგაზრდობის სააგენტო მილიონიანი ფონდის საგრანტო კონკურსის ფარგლებში მიზნად ისახავს ახალგაზრდული ორგანიზაციების, როგორც ახალგაზრდული სფეროს მთავარი კომპონენტის გაძლიერებას, რომლებიც თავის მხრივ არაფორმალური განათლების გზით უზრუნველყოფენ რეგიონში მცხოვრები ახალგაზრდებისთვის კომპეტენციების ზრდას, მხარდაჭერას გაუწევენ ახალგაზრდულ ინიციატივებს და უზრუნველყოფენ მათ ჩართულობას ადგილობრივ და საზოგადოებრივ ეკონომიკურ თუ კულტურულ ცხოვრებაში“, - ნათქვამია ინფორმაციაში.