საბერძნეთის სასამართლომ ნეონაცისტური პარტიის ლიდერს 13-წლიანი პატიმრობა მიუსაჯა

საბერძნეთის სასამართლომ ნეონაცისტური პარტიის “ოქროს განთიადის“ ლიდერს ნიკოს მიხალოლიაკოსს 13- წლიანი პატიმრობა მიუსაჯა, - ამის შესახებ ინფორმაციას „ევრონიუსი“ ავრცელებს. აღსანიშნავია, რომ გასულ კვირას ნიკოს მიხალოლიაკოსსა და მასთან ერთად პარტიის ექვს წევრს, ყოფილ დეპუტატებს, „დანაშაულებრივი ორგანიზაციის მართვაში“ დასდეს ბრალი. გარდა ამისა, “ოქროს განთიადის“ წევრს გიორგოს რუპაკიასს ანტიფაშისტური კამპანიის აქტივისტისა და რეპერის პავლო ფისსასის მკვლელობისთვის სამუდამო პატიმრობა მიუსაჯეს.

პროკურორების მტკიცებით, “ოქროს განთიადის“ 68 წევრმა დაუკვეთა ან მინიმუმ ჰქონდა ინფორმაცია პავლო ფისსასის მკვლელობისა და სხვა დანაშაულების შესახებ. მათივე თქმით, ნეონაცისტური პარტია “ოქროს განთიადი“, რომელიც 2013 წელს პარლამენტშიც მოხვდა, ორგანიზებულ კრიმინალურ ჯგუფად იქცა.