„ევროპული საქართველოს“ საარჩევნო შტაბის უფროსის სერგი კაპანაძის განცხადებით, აუცილებელია, არჩევნებში მონაწილეობა კორონავირუსით ინფიცირებულმა პირებმა, ასევე თვითიზოლაციაში და კარანტინში მყოფებმაც მიიღონ და მათ ხმებს პარტია აუცილებლად დაიცავს.

როგორც კაპანაძემ ჟურნალისტებს განუცხადა, შეუძლებელია არჩევნები სამართლიანად ჩატარებულად ჩაითვალოს, თუ მასში რამდენიმე ათეული ათასი ადამიანი მონაწილეობას არ მიიღებს და მათ ხმებს საფრთხე დაემუქრება.

„აუცილებელია, ყველა ადამიანმა, რომელიც არის ინფიცირებული ან იმყოფება საკარანტინე სივრცეში თუ თვითიზოლაციაში მიიღოს არჩევნებში მონაწილეობა და მათი ეს საკონსტიტუციო უფლება არ შეიზღუდოს. ეს არის პირველ რიგში ხელისუფლების პასუხისმგებლობა. თუ მათ ჰგონიათ, რომ მანიპულაციებით, გაყალბებით ამ ადამიანებს ხმებს წაართმევენ და სათავისოდ ჩაიწერენ, ძალიან ცდებიან. ამიტომ ველოდებით კონკრეტულ წინადადებას, ეს როგორ იქნება უზრუნველყოფილი. ბუნებრივია, გვექნება ჩვენი რეკომენდაციები და კატეგორიული მოთხოვნები. იმიტომ, რომ შეუძლებელია არჩევნები სამართლიანად ჩატარებულად ჩაითვალოს, თუ მასში რამდენიმე ათეული ათასი ადამიანი მონაწილეობას არ მიიღებს და საფრთხე დაემუქრება მათ ხმებს“, - განაცხადა კაპანაძემ.