ამას არ შეიძლება დემოკრატიული არჩევნები ეწოდოს. ეს იყო სიყალბით, ძალადობით გაჯერებული დღე, - ასე აფასებს საპარლამენტო არჩევნების შედეგს „ლელოს“ ერთ-ერთი ლიდერი ბადრი ჯაფარიძე.
როგორც მან ჟურნალისტებს განუცხადა, ისინი არჩევნების შედეგებს ლეგიტიმურად არ ცნობენ.
„წინასაარჩევნო პროცესი იყო ასევე დაშინების, მოსყიდვის, ადმინისტრაციული რესურსის გამოყენება. ეს არჩევნები ვერ ჩაითვლება ლეგიტიმურად იმიტომ, რომ ის არ ასახავს ჩვენი საზოგადოების განწყობებს. ჩვენ დღეს შევთანხმდით იმაზე, რომ ყველანი ერთად ვაფასებთ ამ არჩევნებს, როგორც არალეგიტიმურს და არ ვცნობთ მის შედეგებს. დანარჩენ ნაბიჯებთან დაკავშირებით ვიმსჯელებთ და ჩვენი პოზიცია გვექნება",-განაცხადა ჯაფარიძემ.
ცნობისთვის, დღეს "ლეიბორისტული პარტიის" ოფისში ოპოზიციური პოლიტიკური პარტიები ერთიან სამოქმედო გეგმაზე შეთანხმდნენ. ისინი არჩევნების შედეგებს არ აღიარებენ და საპროტესტო აქციებს აანონსებენ.