„ევროპული საქართველოს“ წარმომადგენელი ხათუნა გოგორიშვილი არ გამორიცხავს, რომ პარლამენტში მარტოდ დარჩენილმა “ქართულმა ოცნებამ“ საპარლამენტო ოპოზიცია საკუთარი შემადგენლობიდან დანიშნოს. შესაბამისი ვარაუდი გოგორიშვილმა „პალიტრანიუსის“ გადაცემა „დღის ნიუსრუმში“ გამოთქვა.

„მათ სიაში ბევრი სპორტსმენი ჰყავთ. ალბათ, ცოტა ხანში ვიხილავთ სპოტსმენთა გაერთიანებას ან რაიმე მსგავსს, რომელიც პარლამენტში იქნება. ასევე, ჰყავთ მუსიკოსები, ხელოვანები - პროფესიული ან სხვა ნიშნით ახალ პარტიებს შექმნიან და ოპოზიციას დანიშნავენ. ეს შუა აზიის ქვეყნების მიღებული პრაქტიკაა, როცა მმართველი ძალა კონკრეტულ ადამიანებს ოპოზიციად ნიშნავს. “ქართული ოცნება“ უკვე აქამდეა მისული“, - განაცხადა ხათუნა გოგორიშვილმა.

ამასთან, გოგორიშვილმა აღნიშნა ისიც, რომ ძალიან დიდია სხვაობა დღევანდელ მოვლენებსა და 2008 წლის საპარლამენტო არჩევნების შემდეგ განვითარებულ პოლიტიკურ პროცესებს შორის, რადგან “დღევანდელისგან განსხავავებით, მაშინ პარლამენტში არჩეულთაგან ყველას წასვლაზე განცხადება არ დაუწერია და არავის საარჩევნო სიები არ ჩაუხსნია“.