ამ ეტაპზე ჩვენი პოზიცია გადახედვას არ ექვემდებარება იმიტომ, რომ ჩვენს ხელთ არსებული ფაქტობრივი მტკიცებულებებით, ოლქების უმრავლესობაში შედეგები უნდა გაუქმდეს, რაც ავტომატურად გულისხმობს არჩევნების შედეგების გაუქმებას, - ამის შესახებ „ლელოს“ ერთ-ერთმა ლიდერმა ბადრი ჯაფარიძემ, „პალიტრანიუსის" გადაცემა „360 გრადუსში“ განაცხადა.
მისივე თქმით, „ლელოს“ მთავარი ამოცანა არის ის, რომ საჩივრების შესახებ ხალხი ინფორმირებული იყოს, რათა მათში არ გაჩნდეს აზრი, რომ საჩივრები უსაფუძვლოა.
ამასთან ჯაფარიძემ აღნიშნა, რომ შემაჯამებელ ოქმებში, სადაც კი შეცვლილია „ლელოს“ ციფრი რეალურად მიღებულ ხმებთან შედარებით - შეცვლილია ყოველთვის შემცირებისკენ.
„ხელისუფლება მართლაც დაინტერესებული რომ ყოფილიყო, რა არის პრობლემა, რატომ არის ეს ოპოზიცია ასე აღშფოთებული დარღვევებით ისინი თვითონ გულწრფელად და ღიად შეისწავლიან ყველაფერს, მაგრამ რას ვხედავთ?! ვხედავთ დადანაშაულებას, რომ თითქოს ოპოზიციას ერთადერთი რამ უნდა მხოლოდ, რომ მოხდეს სიტუაციის ესკალაცია, რომ ოპოზიცია არის დესტრუქციული, ნაცვლად იმისა, რომ იყოს ადეკვატური რეაქცია ოპოზიციის პრეტენზიებზე“, - განაცხადა ბადრი ჯაფარიძემ.